Шер гыч сӧрал алгам, кидшолым ышта

«Кидпашалан изинек шӱмаҥынам. Тиде сомыллан мемнам, икшывыже-влакым, авана кумылаҥден. Ончыч яллаште сӱаным тичмашнек йӱла почеш эртарат ыле вет (Оксанан ава-ачаже Калтаса район Келтей ял гыч улыт.). Изина годым, шарнем, авана сӱанлан оръеҥ ден качылан эре шовычым тӱрла ыле. Ме, кум ӱдыржӧ, воктенже шогылтынна, тӱрлаш полшенна. Тыге чыланат изинек кидпашалан тунемынна», - каласкала Оксана. 

Усталык шӱлышан ӱдырамаш ондак ик жап канзаши техникым шымлен, атлас лента гыч брошкым, пеледыш-влакым сӧрастарен. Но чонжо эше ала-мом оҥайым ыштылаш йодын. Адакшым ӱдырамаш-влаклан тӱжвал сыныштым сӧрастараш кызытсе жаплан келшен толшо, ойыртемалтше арверым ыштен ончаш шонымаш эре ушыштыжо пӧрдын. Школышто тунеммыж годым тыгыде шер гыч тӱрлӧ аҥысыр кидшолым пидмыжат шкеж нерген «ушештарен». Тений кеҥежым Звенигово кундемыш унала мийымыж годым тусо ӱдыр-влакын сӧрал алгаштым ужмеке, шкеат тугайым ыштен ончаш ылыжын.

Шкалан келшыше кидпашалан Оксана уло яра жапшым пӧлекла. Мом кузе ыштышашым интернетыште шымла, тӱрлӧ тӱсан шерым, тугаяк тӱсан резина шӱртым наледа. «Кумыл да фантазий веле ситышт», - ойла кидмастар.