«Туныктышо тӱрлӧ шӧрынан лийшаш»

- Виктория Григорьевна, икымше урокда кузе эртымым шарнеда мо? 

- Школышто кандашымше ий пашам ыштем. Икымше урок кузе эртымым сай шарнем. Пеш тургыжланышым, изи йоча-влак шинчашкем пеш тӱткын онченыт. Икымше урокым тунам йомак семын эртаренам.

- Кӧм «Тиде мыйын наставникем» манын кертыда? 

 - Наставникемлан мый шкемын авамым шотлем. Тудо шкежат изирак класслаште йоча-влакым туныкта. Тыгай пашалан авам изинек шӱмаҥын. 

- Жап ончыко кая, технологият эре уэмеш. Пашаш толмыда деч вара тачысе кече марте туныктымо паша чот вашталтын мо?

- Уке, ты жапыште туныктымо паша чот вашталтме гай ок чуч.

- А тунемше-влакын койышыштым кузе акледа?

- Тачысе саманыште тунемше-влак гиперактивный улыт. Мыйын тунемме годым, мутлан, йоча-влак яра жапыштым эре уремыште эртарат ыле. Телым издер, ече дене коштыныт, модыныт, а ынде телым уремыште йочам от уж, пӧртыштӧ «телефонышто» шинчат.

- Кызытсе илышыште педагог ден наставник могай лийшаш улыт?

- Педагог ден наставник чытышан, умылен моштышо, тӱрлӧ шӧрынан лийшаш улыт. Туныктышын пашаже куштылго огыл.

- Образований системыште мом вашталтеда ыле? Ончыкылык образований системым могайым ужнеда?

- Ончыкылык образований системым кызытсе гайымак ужам. Школышто тӱҥжӧ - тиде туныктышо ден тунемше. Тиде вашкыл ваш ужын мутланен, а дистанционно огыл, шукталтшаш.