Пашаштым кӱкшын акленыт

Кудло ик ияш Борис Шамгулович Красный Октябрь ялеш шочын-кушкын, тыштак ила, «Урожай» племзаводын озанлыкыштыже механизаторлан ышта. Паша стажше 43 ийыш чумырген. Ӱшанен пуымо ораван тракторжо дене кеч-могай пашамат сайын шукта. «Борис Шамгулович гай пашаеҥ-влак шукырак лийышт ыле. Ӱшанен пуымо техникыжым эре тӱз куча, пашажым тыршен, шокшым, йӱштым, йӱрым, лумым ончыде, эр ӱжара гыч кас йӱд марте ышта. Тудлан заданийым пуымеке, ыштышаш сомыл шукталтеш манын ӱшанен кертат», - палемда озанлыкын директоржо А.З. Мухарлямов.

Борис Шамгулович мландым куралеш, тырмала, ӱда, силосым, шурным, сенажым шупшыкта. Пашадарым, мутат уке, сайын тӱлат. Ешыштыжат ӱшанле эҥертыш улеш. Таисия пелашыж дене вич икшывын ача-аваже улыт. «Таза лиям гын, пенсийыш лекмекат, пашам ышташ шонымаш уло. Тӱлат, аклат, пагалат. 

Техникымат куатанраклан эре уэмден шогат, ончычсо гай мазутеш лавырген, йӱштӧ кабиныште от шинче. Вуйлатыше гай ош тувырым чиен, тракторым вӱдет», - каласкала Борис. Йӧрата тудо шке пашажым, садлан лектышыжат уло. 

Борис Шамгулович техникылан шӱман гын, Р.А. Семёнов илышыжым вольыкым ончымо сомыл дене кылден. «Ни машина, ни трактор деке шӱмем ок шупш, а вот вольык - тиде йӧршын весе», - ойла тудо. Радим Алексеевич Красный Октябрь ялыште 1980 ийыште шочын. Кыдалаш школым тунем лекмеке, кок ий, пограничник лийын, армийыште элнан чекшым арален. Пӧртылмеке, фермыш пашаш пурен. Аграрный университетын ветеринар факультетыштыже тунемын, ветеринарлан, осеменаторлан ышташ тӱҥалын. Чумыр стажше 23 ийыш погынен. Тушеч 12 ийже «Урожай» племзаводышто техник-осеменаторын да ветеринарын сомылжым шукта. Шке профессийже дене кум гана районышто мастарлык конкурсышто сеҥен, «Лучший по профессии» лӱмым сеҥен налын. Фотожо шым ий районысо Чап оҥаште кеча, а тений пашажым республика кӱкшытыштӧ акленыт. Пӧръеҥ тыгак мӱкшым онча. 

Борис Шамгулович ден Радим Алексеевичлан ончыкыжат у сеҥымашыш шуаш тыланена, таза лийышт.