Пашаже-влак чоным савырат

- Артем, молан чоҥымо материал шотеш пум ойырен налында? Тудо тендам мо дене сымыстарен?

- Изиэм годым мый моло йоча-влак гай уремыште модын куржталын омыл. Еш кугу, кажне кечын чодыраш коштынна. Тушто пум руэнна, пӱчкынна, шелыштынна, ужаленна. Тиде сомыл тунаре чонеш витен - пум нигунам кидыш ом нал манын шоненам, но теве кузе пӱрен улмаш. 

- Шукертак тиде кидпаша дене шогылтыда?

- Мужыраҥмеке, 2011 ийыште пӧртым чоҥаш тӱҥална. Чыла оксала налаш логалын, тунам пу гыч иктаж арверым ышташ шонымаш шочо. Пырдыжеш сакыме полкым, кухньысо ӱстелым ямдылышым - чонлан келшыш. Икшыве шочмеке, ӱдырем-влаклан кок пачашан пӧрт гай кроватьым ыштышым, суртышто кокымшо пачашыш кӱзаш тошкалтышым вераҥдышым. 

- Иктаж арверым ышташ шонымаш кузе шочеш?

- Ондак суртлан мо кӱлын, тудым гына ыштенам. Адакшым пашаш коштынам. Жап эртымеке, палымем-влак, кидпашамым ужын, нуныланат ыштен пуаш йодаш тӱҥальыч. Ик гана иктым, вес гана весым ыштен ончет, тыге у шонымаш-влак шочыт. Кызыт шукыжым офисыш, рестораныш арвер-влакым йодыт.

- Тыгай кидпашам ышташ тендам мо кумылаҥда?

- Тиде паша шуко жапым, вийым да чытышым йодеш. Пушеҥгым йӧратет гын, уло кумылын ыштет. Родо-шочшем, йолташем-влак тидым кӱлеш семын аклат. Иктаж арверым пӧлек семын кучыктет гын, нунын куанышт эше вийым ешара.

- Пашаштыда могай йӧсылыкым вашлийыда?

- Тиде кидпашам ышташ тӱҥалмеке, тунемаш жап шуко кӱлын. Инструментым пеҥгыдын, кӱлеш семын кучен моштыман. Иктаж арверым ышташ тӱҥалат гын, тудым мучаш марте шуктыман. Ондак оҥам пӱчкедыман, пужарыман. Вара могай сынан, ойыртеман лийшашыжым кагазеш сӱретлыман. Мыняр материал кӱлмым шотлен, ойырен налман, могай деталь-влак кӱлмӧ нерген шоныман. Ӱзгарым кугыт шот дене озалан кӱлеш семын келыштарыман. 

Илыме верыш моторлыкым пурташ кызыт шуко йӧн уло. Тудым илышыш шыҥдарен гына моштыман.