Волгыдо чонан айдеме

Р.К. Ялаева (Камиланова) 1953 ийыште Мишкан районысо Чорай ялыште колхозник ешеш шочын. Чорай школ деч вара 1972 ийыште Уфа оласе энергетический техникумышто химик-технологлан, 1978 ийыште Марий кугыжаныш университетын историй-филологий факультетшын историй отделенийжым заочно, 1989 ийыште Свердловск оласе кӱшыл партийный школым тунем лектын. 

Латвич ий Чорай кыдалаш школышто историй ден обществознанийым туныктен да кугурак пионервожатый лийын. КПСС-н Мишкан райкомыштыжо кок ий инструкторлан ыштымек, кокымшо секретарьлан налыныт. Ик ий тыгак Пӱрӧ оласе 31-ше ПТУ-н Мишкан филиалыштыже историйым да обществознанийым туныктен. Латвич ий Мишкан роношто методический кабинетым вуйлатен, воспитательный, марий йылмым да литературым туныктымо паша-влакым виктарен, ты жапыштак Мишканысе 1-ше да 2-шо кыдалаш школлаште историйым да обществознанийым туныктен. Ныл ий районысо культура пӧлкам вуйлатен.

Рита Ялаева кум ий республикысе марий историй да тӱвыра рӱдерым ыштыме шотышто комиссийын председательже лийын, лу ий наре Мишкан районысо Ӱдырамаш советым вуйлатен. Йошкар-Олаште эртыше IV-VI, VIII, X Марий погын-влакын делегатышт лийын. 

Р.К. Ялаевам III степенян Паша чап орден (1985), Российысе Ӱдырамаш ушемын Чап грамотыж дене палемденыт (2014), БР образованийын сулло пашаеҥже (2003), Яныш Ялкайн лӱмеш премийын лауреатше (2013). 

Юбиляр - «Шуктет гын ойӧрым - илышет лиеш поро» (2005), «Пиалым кушто кычалман?» (2012), «Мишкан кундем нерген» (2013), «А иначе зачем на земле мы живём» (2017), «Об удивительно светлых людях» (2022) книга-влакын авторышт.

Рита Каникиевнан творчествыже 1978 ий гыч тӱҥалын. Тунам тудо пырля ыштыме йолташыже, тунемшыже-влак нерген газетыш изи заметке, очерк-влакым возгалаш тӱҥалын. «Книгам возымо нерген шоналтынат огыл, - ойла тудо. - Тыршен ыштыше школ коллектив, посна туныктышо, директор, клуб але библиотеке пашаеҥ-влак нерген районышто, Пошкырт кундемыште да Марий Элыштат палышт манме шонымаш дене возгаленам, возымемым «Чолман», «Дружба», «Келшымаш», «Марий Эл», «Кугарня» газетлаш, «Учитель Башкортостана», «Марий Эл туныктышо» журналлаш колтенам. Тӱрлӧ семинарыш, конференцийыш, курсыш коштын толмеке, мый ужмо-колмемым возаш веле огыл, чылажланат келге анализым ышташ тыршенам да шкаланем ончыкылыклан изи планым палемден коденам. Жап эртымек, книгам чумыраш тӱҥальым». 

Рита Ялаева кызытат мер паша деч ӧрдыжеш ок код, Мишкан районышто марий йӱлам вияҥдыме верч тырша. Икманаш, волгыдо чонан чолга айдеме улеш.

Рита Каникиевналан ончыкыжымат тыгаяк чулым лияш, марий йӱлам шымлаш да мемнам эше у книга-влак дене куандараш тыланена.