Кажне туныктышо юзо

Дина Андреевна Кутлиярован туныктымо пашаже Мишкан районысо Тӧлдӧ ялыште тӱҥалын. 1985 ийыште Благовещенск педучилищым тунем лекмеке, шочмо ялышкыже пӧртылын. «Пашаш пурымеке, самырык-влаклан кеч-куштат ондак йӧсӧ лиеш. Мыламат ончыч неле лийын, туге гынат йырем ӱшанле еҥ-влак эре полшен, умылтарен шогеныт. Поснак Яна Самалеевна Александровам палемдыме шуэш. Тудым мый наставникем манын кертам, кеч-кунам полыш кидым шуен шоген», - ойла Дина Андреевна. Тиде ийынак самырык туныктышо пошкудо Ардаш ялыш марлан лектын. Тушечын пашаш куд ий телым ече дене, кеҥежым йолын коштын. 1992 ийыште Ардаш школышто воспитательлан ышташ тӱҥалын. Тушто кум ий тыршымек, тӱҥалтыш классыште туныктышылан шогалтеныт. 2003 ийыште Бирск оласе пединститутышто кӱшыл шинчымашым налын да тачысе кече марте Дина Андреевна Ардаш школышто туныкта. 

«Тений школышто ыштымемлан 38 ий лиеш. Мутат уке, тиде жапыште шуко вашталтыш-влак лийыч. Ынде тунемше-влак вестӱрлӧ улыт: тунемаш ӧрканат да пашаланат йогыланат, ончычсо гай вожылмым огыт пале», - манеш тудо. 

Дмитрий пелашыж дене кум ӱдырым да ик эргым ончен куштеныт. Ӱдыр-влак вуеш шуыныт, мужыраҥыныт, эргышт 11 классыш вончен. Дина Андреевна мураш-кушташ уста улеш, ялысе «Акарт» ансамбль дене кылым куча. Районыштышт эртарыме мероприятийлашке гына огыл, тора кундемлашкат кошташ огыт ӧркане. Ешыштыже ачаже, изаже музиканче улыт. «Ончыч мыят шоктем ыле, кызыт музиканым кидыш налмаш уке», - каласыш тудо.

Тений нылымше классыште тунемше 11 йочам - шым эргым да ныл ӱдырым - туныкташ тӱҥалеш. «У тунемме ийлан у вий, у куат дене пашам ышташ ямде улына», - ойла Дина Кутлиярова.