Гармоньчо, туныктышо

Руслан ЯНСИТОВ Мишкан районысо Тынбай ялеш шочын-кушкын. Туштак шинчымашым поген. 9-ше класс деч вара Благовещенск педучилищыш тунемаш пурен, умбакыже Бирск кугыжаныш университетыште шинчымашым нӧлтен.

Шочмо ялысе школышто Руслан Владиславович 19 ий туныктышылан пашам ышта. Руш йылме да литератур, музыка, информатика да эше моло предметлам вӱда. Кутырымына годым икмыняр йодышемлан вашештыш.

- Кызытсе пагытыште туныктышын пашаже могай?

- Туныктымо паша деч посна кагаз паша шуко. А эше икшыве-влак тунемаш ӧрканат, садлан, урок оҥайын эртыже манын, тӱрлӧ йӧн-влакым кучылташ тыршем. Ончыч тунемше-влакат шуко ыльыч, урок веселан эртен: тунемаш йӧратыше-влак коклаште модын шинчыше-влакат лийыныт гынат, чыланат шке шонымашышкышт шуыныт. Кызыт йоча шагал, ончычсо гай школ гӱжлен ок шинче. Шке ял, школ, поснак йоча-влак верч чон коршта. Ял калык сайын илыже, йоча-влак сайын тунемышт, шонымашышт шукталтше манын шонет. Но йоча-влак школым тунем пытарыме деч вара нунын дене кылна ок кӱрылт. 

- Туныктышын пашаже куштылго огыл, шуко предметым вӱдыман, кагаз орам возыман, концертлаште участвоватлаш жапет кодеш мо?

- Шке пашамлан торешым ыштыде, концертлашке кошташ тыршем. Тушко тыге гына лектын от кай, садак ямдылалтат. Адакшым ялыште илыше-влак палат, пашаш миен толмо дене сомыл ок пыте, эре лектынак шога.  

Виолетта пелашыж дене кок икшывым ончен куштат. Тудо ялысе клубышто пашам ышта. Шкетын гына огыл, ешыж денат тӱрлӧ мероприятийлашке коштыт. Икманаш, чыла вереат шушо самырык еш. 

Чонлан келшыдыме пашаште 19 ий ышташ ок лий дыр, шонем. Садлан Руслан Владиславовичын йоча-влакым туныкташ кумылжо эреак лийже.