«Эртыше гыч эн сайжым налын, ончыко ошкылман»

- Олеся Геннадьевна, икымше урокда кузе эртымым шарнеда мо?

- Шарнем, кузе Бирск кугыжаныш педагогический институтым пытарымеке, Мишкан икымше кыдалаш школышто уроклан тыршен ямдылалтым. Чот тургыжланен омыл, но урок тӱҥалме деч ончыч кажне минутлан палемдыме пашам, кажне каласышаш мутемым терген лектым. Урокышто тунемше-влак шып гына аклен колыштыныт, шинчаш ӱшанен онченыт. Вара, нунын тыршымыштым ужын, шкежат кӱлешан пашам шуктымемлан ӱшаненам. 

- Кӧм наставникдалан шотледа?

- Айдеме илышыштыже шуко туныктышым вашлиеш. Нунын коклаште тугай еҥ лиеш, кӧ шинчымашым пуымо дене гына ок серлаге, эше илаш да илышым умылаш туныкта. Тыгай туныктышо-наставниклан мый Мишкан район Чорай кыдалаш школышто англичан йылмым туныктышем Любовь Павловна Танцитовам шотлем. Тудо шке виемлан ӱшанаш туныктен, кеч-могай йӧсылыкым сеҥаш лиеш манын умыландарен.

- Пашаш толмыда деч вара тачысе кече марте туныктымо паша чот вашталтын мо?

- Илыш уэм толеш, шуко технологий кучылталтеш. Тудо пашаште полша гынат, туныктышым алмаштен огеш керт. Туныктышо деч посна садак пашам кӱлеш семын ворандараш огеш лий.

- Тендан школышто ыштыме ийлаште тунемше-влакын койышышт кузе вашталтын?

- Кызыт тунемше-влак телефон, планшет да плеерлан шуко жапым да тӱткышым ойырат. Компьютерым сайын палат, но шке шонымыштым, шижмашыштым йӧсын умыландарат. Туге гынат ойгыраш огеш кӱл, шонем: тунемше-влак аламаҥын огытыл, нуно вестӱрлемыныт. Кажне классыште начар тунемше да йогыланыше, уста да тыршыше ӱдыр-рвезе-влак улыт. Шукынжо кугу кӱкшытыш шунешт.

- Кузе шонеда, кызытсе илышыште педагог ден наставник могай лийшаш улыт?

- Илыш уэмме дене туныктымо пашат уэмшаш. Туныктышо эре уш-акылжым шуарышаш, профессиональный уровеньжым нӧлтышаш.

- Кызытсе образований системыште мом вашталтеда ыле?

- Прогрессым чараш огеш лий. Эртышыш савырнен ончен шогаш огеш кӱл. Тушечын эн сайжым налын, ончыко ошкылман.