МАРИЙ ӰДЫРЛАН ХРУСТАЛЬ КОРОНЫМ КУЧЫКТЕНЫТ

А тиде ныжыл ӱдыр мемнан кундемеш шочын, Мишкан район Кӱрзе ял памашын яндар вӱдшым йӱын, леве южшым шӱлен кушкын. Верысе школым тунем лекме деч вара М. Акмулла лӱмеш Башкир кугыжаныш педуниверситетын Педагогика институтыштыжо дошкольный психологий да педагогика кафедрыште шинчымашым поген. Бакалавриатым да магистратурым «йошкар» диплом дене пытарымек, ик жап Уфаште психологлан ыштен, а ынде кумшо ий Сургутысо 33-шо йочасадыште воспитательлан тырша. 

Мутланымына деч ончыч, интернетысе соцлаштыкшым ончалын, тиде ӱдыр психолог але художник улеш манын шоналтышым, но… йоҥылыш лийынам улмаш. Вероника - илышыште шке пӱрымашым умылаш, моштымашыжым шуараш тыршыше творческий шӱлышан айдеме, школысо туныктышыжын полшымо дене изинек сӱретлаш тӱҥалын да йӧратыме сомыллан кызытат шуко жапым ойыра. Мо кӱлешым ушышто «сӱретлен» да тӱрлӧ арверым шкеак ыштыл моштымыжо конкурсыштат кӱлеш лийыныт.

«Мый шукертак иктаж конкурсышто вийым терген ончаш шоненам. Но тугайыште, кушто кап-кылым да моторлыкым тӱҥ верыш огыт лук - тыгайым Юмо чылалан лыҥ ок пу, - манеш Вероника. - Тидын нерген йолташемланат ойленам, а тудо тыгай увертарымашым ужын да мылам колтен. Тыге конкурсын Интернетысе сайтешыже йодмашым возен кодышым да, мыйын нерген утларак пален налмек, организаторжо Мария Кравцива кастингыш мияш ӱжын йыҥгыртыш». 

«Хрустальная корона Югры» конкурс - элысе да тӱнямбалсе тыгаяк лӱман конкурс-влакын верысе йыжыҥышт. Тудым ӱдырамаш-влакым ончыкыжымат вияҥаш тараташ, мастарлыкым, еш поянлыкым почын пуаш шонымаш дене эртарат. Конкурсышто мисс - ӱдыр да миссис - ешан ӱдырамаш-влак таҥасеныт. Нуно ик тылзе кажне кечын конкурслан ямдылалтыныт: ойлен моштымо мастарлыкыштым шуареныт, этикетлан, макияжлан, прическым ышташ туныктымо мастер-класс-влакыш, репетицийыш коштыныт. 

Иктешлымаш кече эн тургыжландарыше лийын, вет нунылан визиткым, усталык номерым, пайрем вургемым ончыктымо амал дене чыла моштымашыштым тӱрыснек почын пуаш кӱлын. Мутат уке, кажныже ойыртемалташ тыршен. Мемнан землячкынан сӧрал марий тувыр дене марий сем почеш, вӱдвара ден ведра-влакым нумалын, сценыш лывыргын куштен лекмыже да калык ончылно ӱдырым сӱретлымыже жюрин да ончышо-влакын кумылыштым вигак савыреныт. Тыгодым экраныште марий калыкнан илыш-йӱлаж дене палдарыше сӱрет-влак ийыныт…

Эше конкурслан ямдылалтме годымак организатор-влакын да режиссерын Вероникалан «Те мемнан конкурсыш ушнышо икымше марий ӱдыр улыда» манмышт кумылжым эше чотрак ылыжтеныт да кыртмен ямдылалташ таратеныт. «Мый мом кузе ыштышашым шонаш тӱҥальым. Вигак келшыше марий сем ушыш тольо, образ-влак шочыч. Палымем марий тувырым муаш полшыш - тудым Мишкан районысо тӱвыра пӧрт гыч колтышт, а мый эше шовырым ушештарыше ӱмбал вургемым сӱретлаш шинчым, ургызым, шийдарманым ыштылшым кычалаш пижым. Стилизоватлыме «шовырем» шкеак сӧрастарышым: фетр гыч пӱчкын лукмо марий орнаментым, ший окса-влакым ургышым, заказем толын огеш шу манын, оҥеш да вуеш чийыме шийдарманымат поген шуктышым, ведрам моторландарен сӱретлышым. Качымарием вӱдварам ыштен, окса-влакым шӱткален пуыш. Йӱк студийыш миен, видеоматериал дене пырля йоҥгалтараш В. Бояринован почеламутшым возен тольым», - каласкала ӱдыр.

Тыршымыже арам лийын огыл. «Югран хрусталь короныжо» конкурсышто тений ӱдыр-влак коклаште Вероника Алетдинова, ӱдырамаш-влак коклаште Мария Третьякова сеҥеныт. Когыляныштат Москвасе конкурсышто мастарлыкым ончыкташ темленыт, но Вероника вес моткоч кӱлешан амаллан кӧра кызытеш тушко каен ок керт.      

Мучашлан «Паша коклаште кузе конкурслан жапым муыч?» манмемлан «Туныктышо чылалан пагытым муын да чыла ыштен моштышаш», - шыргыжале Вероника.