- Наталья, шкендын илыш корнет дене палдаре.
- Мый Челябинск областьыште Саламат поселкышто шочынам. Ик ийым темымек, ава-ачам Мишкан район Кугу Соказа ялыш кусненыт. Тиде ялыштак кушкынам,11 классым пытаренам. Вара Бирск оласе медико-фармацевтический колледжыш тунемаш пуренам.
- Наталья, молан медицина корным ойырен налынат?
- Моланжым каласенат ом керт. Такшым Бирск ола лишылрак лиеш, шке ялем тораш коден кайымем шуын огыл докан.
- Тыгай неле пашам ойырен налынат. Тунемаш пурымекет, кудалтен кайымет шуын огыл?
- Тыгай шонымаш вуйыштемат лийын огыл. Икымше курс гычак мылам чылажат оҥай лийын. Тиде профессий чонлан келшен, туныктышо-влакын ойлымыштым, кажне мутыштым вуйыш пыштенам. Тыршымем арам лийын огыл: йошкар диплом дене тунем лектынам.
- Колледжым тунем пытарымек, илыш корнет кушко наҥгаен?
- Торашкак огыл, - воштылеш Наталья. - Мишкан селаш пашаш тольым. Ондак вашкеполыш, вара йоча отделенийлаште медсестра лийын ыштышым. А 2018 ийыште акушер-гинеколог отделенийыште медсестралан ышташ тӱҥальым. Но вара тудым петырышт, мыйым врач-неврологын кабинетышкыже кусарышт.
- Тиде верыште тыланет пашам ышташ келша? Пациент-влак кызыт могай улыт?
- Моло верыштат уло кумылын ыштенам, тыштат тыршем. Паша кече кандашылан тӱҥалеш гын, мый пел шагат ончыч толам. Чыла ямдылем, кварцым чӱктем, документ-влакым возем. Пациент-влак тӱрлӧ лийыт. Но ала-молан чыланат ик таблетке дене гына черым пытарынешт, - воштылеш Наталья.
- Ешет нергенат палыме шуэш.
- Тышке пашаш толмеке, ешым погышым. Станислав пелашем Йӱдвелыште пашам ышта. Кум икшывына уло. Екатерина ӱдырем 3 классыште тунемеш, Данила эргым садикыш коштеш, Алина ӱдырем ик ият вич тылзаш.
- Тугеже, кызыт декрет канышыште улат?
- Чыла сай лиеш гын, шыжым ӱдыремым садикыш колтынем, а шке пашаш лектам. Мӧҥгыштӧ шуко шинчет гын, вара ӧрканет, - воштылеш Наталья.
- Тау жапым ойырыметлан. Таза да пиалан лий, Наталья!