- Жанна Анатольевна, туныктышылан мыняр ий ыштеда?
- Латвич ий школышто тыршем. Благовещенск оласе педколледжым тунем лекмеке, йоча-влак дене пашам ышташ тӱҥальым. Тунам шоненам: ӱдыр-рвезе-влакым туге туныкташ тӱҥалам - классыштем чылан отличник лийыт, - воштылеш. - Ик жап гыч умылышым: чылан отличник лийын огыт керт улмаш. Тӱҥжӧ - икшыве чын айдеме лийын кушшо, ача-аважым, кугыеҥым пагалыже, шочмо элжым йӧратыже, пашалан кумылаҥже. Тугай айдеме илышыште шке корныжым муэш.
- Кӧм «Тиде мыйын наставникем» манын кертыда? Молан?
- Н.П. Аптыковам наставникемлан шотлем. Пашаш тӱҥалме годым чылажымат пален, умылен шуктен омыл. Наталья Павловна тунам мылам полыш, кугу эҥертыш лийын. Тудлан таум каласем, тазалыкым, пиалым тыланем.
- Жап ончыко кая, технологият эре уэмеш. Пашаш толмыда деч вара тачысе кече марте туныктымо паша чот вашталтын мо?
- Эн тӱҥжӧ тугаяк кодын: тунемше-влаклан шинчымашым погаш, палымыштым, моштымыштым илышыште кучылташ туныкташ, кумда илыш корнышто чын корным ойырен налаш полшаш.
- Тендан пашам ыштыме жапыште тунемше-влакын койышышт кузе вашталтын?
- Кызыт тунемше-влак лӱддымӧ улыт, аудиторий ончылно выступатлаш огыт вожыл - тидын дене сымыстарат. Южо икшыве телефонышто, компьютер ончылно шуко жапым эртара - тидыже лӱдыкта.
- Кызытсе илышыште педагог ден наставник могай лийшаш улыт? Кузе шонеда?
- Илыш дене тӧр ошкылман, вашталтыш-влакым шотыш налын, уым умылен, пашаште кучылтман. Туныктышо мыняр пашам ышта, тунар тунемеш.
- Ончыкылык образований системым могайым ужнеда?
- Образований системыште туныктышо деч посна нигузе огеш лий. Тудым нимогай робот огеш вашталте. Туныктышо (айдеме) гына икшывын чонжым умылен мошта, кӱлеш годым полшаш ямде улеш.
- Йодыш-влаклан вашешташ жапым ойырымыланда кугу тау! Пашаштыда сеҥымашым, чоныштыда ласкалыкым тыланена.