Антонида Анатольевна, сулен налме канышыш лектын гынат, «Шонанпыл» ансамбльыш мураш коштеш. Мурышо да куштышо ансамбльын еҥже-влак тудын ургымо тувыр-влакым чият. Поро, ура чонан ӱдырамаш книгагудын да клубын эртарыме мероприятийлаште марий йӱла нерген каласкала, шке кидпашаж дене палдара. Ялысе Кӱсото кумалтыш капка вуйыш сакышаш шовычыш сылне марий тӱрым тӱрлыш. Районысо фольклор пайремлаште мастер-классымат ончыкта. Теве тыгай мемнан Тоня акайна.