Садлан шуко ӱдырамаш туддеч тувырым урген пуаш йодеш, мурышо-куштышо коллектив-влакланат полша. Тыгай пашам шукташ пеш шуко жап, чытыш да мастарлык кӱлыт. Уста ӱдырамаш чӱчкыдын мастер-классым эртара, вуеш упшалме такиям, оҥеш сакыме согам кузе ямдылымым, кунам да могай вургем дене нуным чийыме нерген умыландара. Вургемым сӧрастарыше кажне арвер, тасма але тӱр мом-гынат ончыкта, тувырым ургымо годым тидымат палыман.