Кеч-могай сомылжат сайын ворана

Антонида Дмитриевнан кеч-могай сомылжат сайын ворана. Тудлан ургаш, пидаш, тӱрым тӱрлаш келша. Сар ийлаште да туддеч варасе нелырак жапыште кушмылан кӧра ешыштыже изинек кидпашалан шӱмаҥденыт, ургашат тунемын.   

Вуеш шумек, Нижний Новгород кундемыш торф лукмашке пашам ышташ миен. Мӧҥгӧ пӧртылмӧ деч вара ешым поген. Пелашыж дене коктын вич икшывылан илышым пуэныт да кугемден шогалтеныт. 

Антонида Дмитриевна колхозышто презым ончен. Паша кокла гыч шке озанлыкыштыже чыла сомылым шот дене виктарен шуктен да, жапше шагал лийын гынат, икшывыже-влаклан вургемым, шкаланже мотор марий тувырым ургаш йӧным муаш, йодын толшо лишыл еҥ ден палымыже-влакын кумылыштымат шукташ тыршен. Кажне марий тувыржо ойыртемалтше лийын. Нуным сӧрастараш тӱрлӧ чиян куэмым, тасмам, чылдарым кучылтын. Канде каван, йӱдсаре кечын тӱсышт дене икгай лийыныт, а ончылсакышысе пеледыш-влак мотор пӱртӱсым ушештареныт. 

А.Д. Дмитриева Арланысе художественный самодеятельность коллектив дене пырля сценыш марий койыш-шоктышнам ончыкташат лектеден. Тудо моторын мура-кушта да почеламутым каласкала ыле.