Тунеммашет шкаланет

Марла тувырым кунам ургаш тӱҥалмыж нерген йодмемлан тыге вашештыш: «Кеч-могай жапын шке «модыжо» уло. Ӱдыр-влак ынде «брюкыш кусненыт», ондак тувырым чият ыле. Мемнан годым утларакшым «тасмам пыштыман» тувырым йӧратат ыле. Мыят авамын кондымо тӱрлӧ тӱсан тасма-влак дене ургенам. Шке ургет гын, эре эскерет: кӧ могай тувырым чиен, кузе ургалтын? Ик жап гыч «шырчык умша» модыш пурыш. Вара тӱрлеман тувыр-влак толын лектыч. Ялыште  чылан икте-весым палат, тыге я икте, я весе ургаш кондаш тӱҥальыч».   

Ольга Сергеевна Мишкан районысо Кугу Соказа ялеш шочын. Тусо школыштак шинчымашым поген. 1979 ийыште пошкудо У Тымбай ялыш марлан лектын. Тушто икмыняр жап илымек, Пӱрӧ районысо Бажан селаш кусненыт. Презым ончышылан пашаш пурен, ынде тыште илаш тӱҥалмыштлан 39 ий лиеш. 

- Вольыкдат лийын, пашашкат коштында. Кузе кидпашалан жапым ситаренда?

- Ушкалым, шорыкым - чыла ашненна. Кастене, изиш каналташ манын, кидпашалан шинчам ыле. Кызыт шкетын илем гынат, садак вольыкым ончаш тыршем. Кӱтӱм кӱташ еҥым тарлем. Кайыквусымат ончем. Икшыве-влак ешаҥыныт. Жанна ӱдырем ден Юра эргым ешышт дене Уфаште, Инна Благовещенск олаште, Инесса Москваште илат. 

Ольга Сергеевна деке мийымем годым Инесса ӱдыржат толын ыле. «Мыят кидпашам ыштем. Авам ыштылме годым кузе яра шинчет? - манеш. - Тувырым тӱрлышым, крючок дене паласым пидым. Яра жап лийме годым мыят вигак кидпашалан пижам». 

«Тунеммашда шкаланда», - ойлат кугурак-влак. Ынде кевытыште чыла шонымым  налаш лиеш, кычал коштшаш уке. Социал лаштыклаштат ужалыме нерген шуко увертарымаш коеш. Тугат, телефон дене модмо олмеш кидпаша дене шинчылтыда гын, пайдаже шукырак лиеш. А Ольга Янсубаевалан тазалыкым да умбакыжат кидпашаже ушнен толжо манын тыланена.