Пушкыдо модышыжо куан кумылым пӧлекла

Е.Г. Кабирова 2003 ий годсек 16-шо школышто ышта, Бирск кугыжаныш педагогика институтышто руш йылме ден литературым, историйым, обществознанийым туныктышылан тунем лектын, кызыт икшыве дене декрет отпускышто шинча, но йӧратыме сомылжылан жапым муашак тырша.

Кидпашалан уста ӱдырамаш ончыч шкаланже, ешыжлан вургемым, тӱрлӧ арверым пидын гын, кызыт плюш шӱртӧ гыч крючок дене пушкыдо модышым пидаш кумылаҥын. «Иктаж-мом уым, оҥайым пидын ончымо шуын», - ойла тудо. Икана палымыже-влак пушкыдо модышым пидын пуаш йодыныт. Тугайжым тымарте нигунам ыштен огыл гынат, маскаигым пидын ончен. Келшен. Эше йодыныт. Тыге изи пушкыдо модыш-влакым пидмаш тудым тӱрыснек авалтен. Кӱчык жапыште «вургеман» 30 мераҥигым да 20 мераҥым пидын. Утларакшым нуным 2023 ийын символжо семын келыштарен. Тыге у опыт погынен: пидаш писын да шуко. Таче тудо плюш шӱртӧ гыч тӱрлӧ оҥай янлыкым - маскам, мераҥиге-влакым, молым - сӧрастара. Пашаже-влак чатка, мотор улыт, чонанла, кевыт гыч налме гай койыт. Модышым пидаш оҥай идей-влакым Елена Геннадиевна интернетыште муэш. Кодший октябрь гыч У ий марте тудо 100 утла модышым пидын. «Тыгай модыш икмыняр йыжыҥ дене пидалтеш, - каласкала тудо. - Эн ондак кап-кыл ужаш-влак пидалтыт, ушалтыт, вара вургемым шоныман. Тыге чумыр образ шочеш». 

Пушкыдо модыш - тиде чапле пӧлек. Е.Г. Кабирован мутшо гыч, йодмо почеш пидме годым пачерышт пуйто выставкыш савырна. Тыгай годым нуным кушто аралыме йодышат лектеш. «Пашам-влакым эн ондак икшывем-влак аклат. Шинчаштышт куан сескем - мылам эн тӱҥ ак. Кажне пидме арверыш уло чонем пыштем. Ок келше гын, уэш рончен пидам. Кажне шӧрга шке верыштыже лийшаш», - ойла кидмастар. Елена Геннадиевна  мастарлыкшым эре шуара, онлайн йӧн дене тӱрлӧ мастер-классыш ушна. Оҥай хоббиже деч пелашыжат ӧрдыжеш кодын огыл, модыш-влакым йодшылан намиен кода. Аважат полышкала. 

Тек Елена Геннадиевнан усталык пашаже-влак ончыкыжат шинчам куандарат, куан кумылым пӧлеклат.