Все новости

Туныктышынам пагалена

Марий йылме авала чучеш. Тудо ныжылге, шыма шомакше пеледыш гай сылне. Шочмо йылме илышыште эн шергакан. Марий йоча шке йылмыж дене кугешнышаш. Мемнан туныктышына Анжела Леонидовна Юзукбаева тыматле, поро улеш, эре кӱлешан ой-каҥашым пуа. Урокна пеш писын да пайдалын эрта. Классыште иктат «мален ок шинче». Тудым чот пагалена. 24 февральыште Анжела Леонидовна шочмо кечыжым палемда.

Туныктышынам пагалена
Туныктышынам пагалена

Пагален, йӧратен, куанен, мокталтен,

Йывыртен ойлена, тауштен поро ден.

Моткоч писын лудаш, шер пырчын возаш…

Чын айдеме лияш тыршенда туныкташ.

Лийынна гын ала изишак йогырак,

Туныктенда мемнам шке шочшо гаяк.

Садлан ме Тендам йӧратен шарнена,

Изирак пӧлекнам шӱм гочна колтена.

Лийза кумылан, тичмаш пиалан,

Уныкан уныкам ужашлан ӱмыран.

Тек чонда веселан йочан гай юарла.

Илышнажын эн сайжым Те сулен улыда.

Автор:Яныш Ялкайн лӱмеш марий гимназийын 10-шо классыштыже тунемше-влак. Чорай села, Мишкан район.
Читайте нас: