Изинек сӱретлаш йӧратен

Павел Сайниевичын пӧртшӧ ял мучаште верланен, садлан пӱртӱсат тудлан у радына-влакым сӱретлаш вийым пуэн шога докан. Йӧратыме кочаже нерген Илона уныкаже пеш оҥайын каласкала: «Павел Сайниевич - авамын ачаже. Ончыч тудо школышто пашам ыштен, йоча-влакым сӱретлаш туныктен. Кызыт сулен налме канышыште улеш. Ме урем гоч гына илена, садлан мый кажне кечын кочаммыт деке коштынам. Тудо эре мом-гынат сӱретлен, а мый кӧранен онченам. Кочаем школышто тунеммыж годымак сӱретлаш йӧратен, эн сай пашаже-влакым районысо газетыш колтен шоген. Аваже чыла сӱретшым поген. Кочай школышто пашам ыштымыж годым коридорым, класс-влакым сӧрастарен. Миен пурена да коридорышто пеледыш ате-влакым кучен шогышо мотор ӱдыр-влакым ужына. А пурла могыр пырдыжыште, вӱд воктене, кум ӱдырым сӱретлыме. Школышто моло пашажымат ужаш лиеш. Кажне классыште аҥысыр тюльым сакаш пеш сӧрал гардиным ыштен. Кочамын жапше шагал лийын гынат, тудо эре сӱретлен, выставкылан ямдылалтын. Выставкыже-влак Караидельыште, Бирскыште, Уфаште, Марий Элыште, Санкт-Петербургышто, Агидельыште эртеныт. Калык радынаже-влакым куанен ончен. Журналист-влак газетеш шуко поро мутым возеныт. Нунылан ныжылге тӱсан чия-влакым кучылтмыжо, сӱрет-влакын сюжетышт, символикышт келшеныт. Тыгай поро мут-влак кочамым кумылаҥденыт. Мыланем кочамын «Ӱдырем», «Пеледыш-влак», «Кеҥеж кас», «Шудо погымаште», «Еш» да моло пашаже-влак келшат. Мыят, кочам нарак огыл гынат, сӱретлаш йӧратем». 

Шамыкаевмыт чодыра воктен илат. Кеҥежым эр гыч кас марте кайык мурым колыштыт. А ватыже, Наталья Яковлевна, садыште могай гына пеледышым огеш кушто. Садланак марийжын сӱретлаштыже пӱртӱс да ял илыш кугу верым налын шогат. Картиныже-влакым ончен, шерет ок тем, эре ончымет вел шуэш. Школышто тунемше-влакат сӱретче дек миен коштыт. Поро кумылан Павел Сайниевич нунын мийымыштлан куана, сӱретлыме пашаже-влакым ончыкта.

 П.С. Шамыкаев шым икшыван ешеш шочын, ава-ачан икымше йӧратыме да вучымо эргышт лийын. Ачаже, Сайний Шамыкаевич Шамыкаев, 1942 гыч 1945 ий марте сарыште лийын. Тушто пурла кидше сусырген. Мӧҥгыжӧ 1947 ийыште пӧртылын. Колхозышто ончыч куштылго пашам ыштен, вара комбайныш шинчын.

 Ача эрге шочмылан моткоч куанен. Кушмыжым вучен, комбайныште полышкалышылан туныкташ шонен. Жап эртыме семын йоча кушкын, изинек комбайн йыр пӧрдаш тӱҥалын, вара ачажын полышкалышыже лийын, а яра пагытыште сӱретлен шинчен. Ачаже ончыч сырен ончен. Ик кече пасушто кочкын шинчымыж годым газетыште Павылын пашаже-влакым ужын. Сӱретше чылалан келшен. Тулеч вара ача Павыллан сӱретлаш мешаен огыл. Эргыже икмыняр портретым сӱретлен, нуным аваже пырдыжеш пижыктен. Тиде портрет-влак кызытат пырдыжыште кечат. 

Рвезе, кушкын шогалмек, Военно-Морской флотышто служитлен. Сӱретлыме пашажым кудалтен огыл. 1982 ийыште Уфаште институтым тунем лектын, художник-живописец специальностьым налын. Радынаже-влак погынымек, выставка нерген шонаш тӱҥалын. 2000 ийыште Караидель селаште икымше ончерже почылтын. Туддеч вара сӱретше-влак дене шуко вере лийын, но 2006 ийыште Йошкар-Олаш мийымыжым, марий художник И. Ямбердов дене вашлийын мутланымыжым нигунам ок мондо. 

Пагалыме Павел Сайниевич, уло кумылын шымле ияш юбилеет дене саламлена. Сӱретлыме пашаштет уҥымашым, ешыштет татулыкым, тумо гай пеҥгыде тазалыкым тыланен кодына.