Модышыжо пеш сӧрал

- Москваште 14-18 декабрь кечылаште лийше ярмиҥгаш кайыме деч ончыч вийым пыштен тыршаш логале. Тиде илышыштем эн кугу выставка, садлан мучашдымын йывыртенам. Тушко кугу элнан чыла кундемлаж гыч - Калининград гыч Камчатка марте - лыҥ кидмастар миен. Мыйынат модышем-влак - мамык гыч ыштыме изи ӱдыр-эрге, Йӱштӧ Кугыза-влак - калыклан келшышт манын шонем - «шондыкем» ярсыш, иктыжымат мӧҥгеш шым кондо.

- Модышда тунар сӧрал, Интернетысе соцкылыш шындыме фото-влакым «Мамык гычат тыгайым ышташ лиеш мо?» манын ончем.

- Модышлан ончыч чеп каркасым ямдылем, йытын мамык гыч кап-кылым «куштем». Кажне лончым клейстер дене йыгем, коштем, вара вес лончым пыштем. Мучашлан шымартем, акрил чия дене чиялтем да лакым йыгем. Йытын мамык гыч ыштыме модыш пеш мотор лиеш, чия вошт текстурыжат коеш. Ик модышым ышташ арня наре жап кӱлеш.

- А курчакда-влакын чурийышт мога-а-ай сӧрал! Кажныже шке ончалтышан, ойыртемалтше койышан улыт. Тӱжвал сынышт дене совет саманысе икшыве-влакым шарныктат.

- Мый тугаяк лийышт манын тыршем, чурийыштым ожнысо открыткылаште эскеренам. Сюжет-влакат пуйто мемнан йоча жап гыч налме улыт - икте ечым нумал кая, весе булкым але шырчык омартам, изи кольмым кучен…

- А чурийышт мамык гыч ыштымыла огеш кой.

- Тудым лӱмын заказатлыме молд (форма) полшымо дене шун гыч ненчылем да келыштарен сӱретлем.

- Эсогыл модышыштат мастарын почын пуымо композиций, пропорций, тӱсым келыштарымаш вигак шижалтыт. Те тыглай кидмастар гына огыдал, профессиональный образованийдат уло докан?

- Уло, - шыргыжеш Маргарита Изибаевна. - Тудак творчество корныш лекташ полшыш. Школышто тунеммем годым (Мый Краснокам район Ушмен ялеш шочынам.) Коян художественный школышто ешартыш шинчымашым погышым. Преподавателем Лариса Сабирьяновна Тукмачевам кызытат порын шарнен илем - тудо мыйым композицийым умылаш, ненчылаш туныктыш. Вара Уфаште 64-ше художественный профессиональный колледжым тунем лектым, Башкир кугыжаныш пединститутын художественно-графический факультетыштыже кӱшыл шинчымашым нальым. Шым ий Ушмен школышто икшыве-влаклан изобразительный искусство да черчений предметлам туныктышым, тыгодымак Коян искусство школыштат пашам ыштышым. Но… Ушмен школым петырышт, мый паша деч посна кодым. Тидыжак илышыштем тура савыртышым ышташ да Уфашке илаш куснаш таратыш. Тыште компьютер графика курсым тунем лектым. Эркын йӧратыме творчество сомылым ончыл верыш лукмо мартеат илен шуым.

- Вигак мамык гыч модышым ышташ тӱҥалда мо?

- Ончыч куэм гыч аралтыш курчак-влакым ыштылам ыле. Нуным палымем-влаклан пӧлекленам. Илен-толын, заказ почешат ышташ тӱҥальым, модышем-влакым кевытышкат ужалаш пуэм. Кумыл улмо годым тӱрлӧ материал гыч «шоя» каминым ыштылам - колледжыште пу гыч тӱрлӧ арверым пӱчкедаш тунеммемат кӱлеш лие.

- Маргарита Изибаевна, усталык пашада шушаш ийыштат сайын вораныже, у шонымаш-влак памашла шолын лектышт, эше шуко-шуко выставкыште шке вийым тергаш, «шулдырым куштен» толаш йӧн лектынак шогыжо!