«Кочкышна мӧҥгыштӧ ямдылыме гаяк тамле лийже»

- Лиана Владиковна, предприятийыштыда шуко тӱрлӧ кочкышым ямдыледа?

- Бирск ола шукертсек тамле пельменьже дене палыме. 2015 ийыште меат пельменьым ышташ тӱҥална. Кызыт предприятийна витле утла тӱрлӧ шылан кылмыктыме полуфабрикатым луктеш. Тыште витле еҥ тырша. Тыгай кочкышым ямдылаш шкенан «пӧртна» уло. Тений кинде кочкышым да кондитерский изделийым лукташ тӱҥална. Тыгайже шӱдӧ витле утла тӱрлыш чумырга. 

- Продукцийдам кушто ужаледа?

- Продукцийым лукташ тӱҥалмек, вигак икмыняр кевытым почна. Нуно Бирск, Благовещенск, Уфа олалаште, Мишкан районышто да Краснохолмский посёлкышто верланеныт. Кылмыктыме полуфабрикат-влакым «Every Day» кевытлаште да Тюмень ден Сургут олалаштат ужалат.

- Шукерте огыл Уфаште «Наш бренд» выставкыште Гран-прим налында. Тыгай конкурслаште вийдам чӱчкыдын тергеда?

- Мемнан кылмыктыме полуфабрикатна-влак «Башкортостанын продуктшо» товарный знакан улыт. Ме Бирск олаште эртарыме ятыр мероприятийыште участвоватлена. «Наш бренд» продукт ярмиҥгаште кажне ийын вийнам тергена. 2018 ийыште той, 2020 ийыште шӧртньӧ медальым сеҥен нална. Тений «Изысканный» пельменьна бренд лие, тудлан Гран-прим кучыктышт. Тиддеч посна ончылий «Ӱдырамаш - идалыкын директоржо» да «Бизнес-успех» республикыште эртыше конкурслаште вием терген ончышым. 

Мемнан пашанам республика вуйлатыше Р.Ф. Хабиров, ужалымаш да услуга министр А.Н. Гусев да Бирск район администраций вуйлатыше А.В. Талаловат ужыныт. Предприятийнам БР вуйлатышын таумутан серышыже, республикысе Ял озанлык министерствын да Предпринимательство шотышто кугыжаныш комитетын Чап грамотышт дене палемденыт. 

- А те шкеже иктаж гана «Предприниматель лиям» манын шоненда мо? 

- Образованием дене мый общественный питанийын технологшо улам. Латик ий Бирскыште шыл гыч полуфабрикат-влакым ямдылыше производствышто пашам ыштышым, формовщица гыч цех вуйлатыше марте кушкым. Тушеч кайымек, мӧҥгыштӧ, кухньым «изи производствыш» савырен, икшывем-влак да пелашем дене пырля пельменьым ышташ тӱҥална, ава-ачана ден родо-шочшына-влакат полшышт. Пел ий гыч нылле квадрат метр кумдыкан пӧлемым айлышна. Тушто ик пашаеҥ ыле, вара ончыч пырля пашам ыштыме йолташем-влак, марием ушнышт. Кызыт чылан пырля икоян еш семын тыршена. Кочкышна мӧҥгыштӧ ямдылыме гаяк тамле да сай качестван лийже манын, свежа шылым налына, полуфабрикат-влакым кид дене ыштена, тушко нимогай «химийым» огына ешаре.

- Тау, Лиана Владиковна, йодыш-влаклан вашешташ жапым ойырымыланда. Пашада ончыкыжымат сайын вораныже, лектышда поян лийже!