Илышыжым тӱвыралан пӧлеклен

Тиде кечын ялысе тӱвыра пӧртыш ретро-мурым йӧратыше, студент, туныктышо, тыгак лишыл еҥже да шочшыжо-влак - икманаш, тудын творчествыжым аклыше да пагалыше кумылан еҥ-влак погыненыт ыле. Художественный вуйлатыше лӱмеш сцена гыч кас мучко тауштымо шомак, йӧратыме да кумдан палыме калык муро-влак йоҥгышт, ончаш толшо-влакым тӱрлӧ куштымаш-влак куандарышт. 

Пайрем касыш уна-влакат - районысо тӱвыра пӧлкан вуйлыкшо Л.Ш. Халилова ден вуйлатышын клуб паша шотышто алмаштышыже Н.К. Шугаепова толыныт ыле. Нуно Валерий Шумадаловичын Нуриман районын тӱвыра да искусство аланжым вияҥдымашке суапле вийым пыштымыжым палемдышт. 

Концерт ик шӱлыш дене эртыш. Тудо кажне ончаш толшылан ласкалыкым, пайрем кумылым пӧлеклыш. В.Ш. Имаевлан пеҥгыде тазалыкым да усталык аланыште у деч у сеҥымашым тыланена!