Чылажат шарнымашеш кодеш

Кильдубай Килинбаевич эртыше илышыжым тыгерак шарналта: «Мый ешыште ик икшыве гына ыльым. Авам ачай деч 14 ийлан кугурак улмаш. Авамын пылышыже ок кол ыле. Илыш нелылан кӧра 4 классым гына тунем кертым. 12 ияш пашам ышташ тӱҥальым, ӱшкыж дене пасум куральым. Изиш кугу лиймекем, тракторым ӱшанен пуышт. Аток дене (мый дечем кугурак) пырля комбайнерын полышкалышыжлан ыштышна.

Ачам, Килимбай Илинбаевич Илинбаев, 1942 ий январьыште сарыш кайыш. Ме авам дене коктын гына кодна. Кертмына семын ончыкылык илыш верч тыршышна. Ачам сар деч вара 1945 ий май тылзыште пӧртыльӧ. Ме пеш чот куанышна. Тудлан Чап орденым пуэныт.

Мый 1951 ийыште ешым погышым. Вара колхозышто электриклан ышташ тӱҥальым да, пенсийыш кайымешкем, тиде пашам шуктышым. 1992 ийыште сулен налме канышыш лектым».

К.К. Килинбаев ден йӧратыме пелашыже 68 ий пырля иленыт. Но, чаманен каласаш логалеш, пелашыже Аня Байметовна ош тӱня дене чеверласен. Вате-марий 4 ӱдырым да 1 эргым ончен куштеныт. 

Кызыт Кильдубай Килинбаевичым шешкыже, Светлана Айдыбаевна, онча (эргыже шукертак ош тӱня дене чеверласен): шокшо, пушкыдо кочкыш дене сийла, вургемым, постельым мушкын эрыкта. Кочам 10  уныка да 12 кугезе уныка куандарат.

Шочмо кечыже вашеш Кильдубай Килинбаевичлан Россий Президент Владимир Путин лӱм дене колтымо саламлымашым кучыктеныт. Тиде саламлымашке меат ушнена да кужу ӱмырым, пеҥгыде тазалыкым тыланена.