Все новости
Айдеме пашаж дене мотор
8 Сентябрьыште 2022, 10:54

Илалше-влаклан моткоч сай каныш

«Башкирское долголетие» туристический программын йӧнжылан эҥертен, август мучаште ме, Шаран район пенсионер-влак, Уфашке миен толна. «Уфа историческая и современная» ик кечаш экскурсийыш тарваныше тӱшканам Г.Г. Агапитова вуйлатен.

Авторын колтымо фото-влак.
Фото:Авторын колтымо фото-влак.

Пеш чапле автобусыш шинчын, сулен налме канышыш лекше 42 еҥ шым шагат эрдене республикынан рӱдолашкыже нӧлталтше кумыл дене кудална. Кок пачашан экскурсионный автобус дене Уфам ончен коштмо годым «Титаник» фильмысе кугу корабльыште шинчымына гай чучын. Гидын ойлымыжым тӱткын колыштмо коклаште автобусын кӱшыл окналаж гыч Уфан тӱрлӧ сӱретан архитектурыжым эскерышна. Салават Юлаев лӱмеш площадьыште йолын ончен коштмат пеш шуко оҥай шарнымашым кодыш. Пошкырт калык талешкын памятникше, Келшымаш монумент воктене ятыр снимке-влакым войзышна. Мемнан кокла гыч шукынжо Уфаште тунемме самырык жапыштым, Ош Виче серыш куржталмыштым шарналтышт, кызытсе Уфа тугодсо деч ятырлан уэммым да вашталтмым палемдышт. Республикысе Национальный музейыште шинчымашнам ятырлан пойдарышна. «Урал Тау» кафеште кечывал кочкышым ыштымек, мыланна «Колёсовъ» теплоход дене Ош Виче эҥерыште экскурсийым эртарышт. Тиде ончен коштмо тур пеш келшыш, тудым эртарыше-влаклан таум каласыме шуэш.

«Тыгай программа почеш мемнам ӱжмыштлан, республикын рӱдолажым, исторический верлажым уэшын шарналтен ончен кошташ йӧным ыштымыштлан организатор ден экскурсовод-влаклан таум каласена да нунылан чыла сайым гына тыланена», - иктешлыш Н.М. Давлетова экскурсий деч вара. Молыштат тудын ойлымыж дене келшышт, «Тиде кужашлан шарнымашеш кодеш, уэшын вес гана вашлияш ӱшаным пуа» манын чеверласышт.

«Башкирское долголетие. Туризм» проект республикын оҥай да мотор верже-влакым, пӱртӱс поянлыкшым, тӱвыра кылжым ужаш да пален налаш йӧным ышта. Тиде программын условийже почеш 55 ияш деч кугурак ӱдырамаш да 60 ияш деч кугурак пӧръеҥ-влак идалыклан ик гана республика мучко экскурсийыш лектын кертыт. Тидлан улыжат «долголетие.соцтуризмрб.рф» сайтыште регистрироватлалташ кӱлеш.

Автор:Г. АХМЕТШИНА. Шаран район.
Читайте нас: