Шым классым куд ийыште тунем лектын, молан манаш гын первый классыш кошташ вургемже лийын огыл, садлан варажым вигак кокымшыш шынденыт.
Ӱмыр мучко колхоз пашаште тыршен. Вич икшывым куштен, кызыт тудым 10 уныка да 11 кугезе уныка-влак куандарат. Авам кызытат кид пашам ышта, газетымат очки деч посна лудеш, сурт сомылка коклаштат шогылтеш. Адак тудо пеш уста ойлызо, эртен кодшым пеш оҥайын каласкала. «Илышыштем мом гына ужаш логалын огыл - чыла чытенам»,- манеш.