Аважын мутшым шукта

Т.Т. Биктимиров 1940 ийыште теле тылзын 13 кечыштыже шочын. Ачаже - Тимирок Биктимирович (1915-1941), аваже - Татьяна Саметовна (1918-1985).

Тудын ачаже Москвам тушман деч аралыме годым колен. Тимирьян улыжат пел ияш веле лийын. Аваже «Йошкар Армий» колхозышто пашам ыштен. Тиде ӱдырамашлан шокшо-йӱштым шуко ужаш логалын.

Тимирьянлан шым ий теммеке, Яндалче коваже уныкажым школыш колта. Икымше классыште 15 йоча тунемын. Тунам тудо пеш сай йолташым - Анатолий Атналиным - муын. 

Кочаже, Биктимир Сирбаевич Сирбаев, колхозышто уста столяр лийын. Уныкажланат тиде мастарлыкым шӱмышкыжӧ пыштен коден. Тимирьян павайын икымше арверже пӱкен лийын. Тудо кызытат аралалтеш. Варажым, кид вийым налмеке, колхозлан кӱлшӧ тӱрлӧ ӱзгарым ышташ тӱҥалын. Илен-толын, столярыш савырнен. Чыла ӱзгарже тудын пушеҥге да воштыр гыч ышталтын. Комбо да лудо-влаклан чатырым тодын. Ялыште Тимирьян Биктимиров ик эн мастарлан шотлалтын.

Эше ик поро пашаже - памашым ончымыжо. Йоча годсо жап гыч эн сай шарнымашыже - ава дене памашым почмо кече. Тиде 1945 ий апрель мучаш лийын. Варажым шырчен лекше вӱдлан «Сеҥымаш памаш» лӱмым пуэныт. Памаш кызыт мартеат вӱдшым шыргыктен йоктара. Тиде сылне верыш ял калык вӱдлан да арверым шӱалташ коштеш. Татьяна Саметовна эргыжлан памашым ончаш да аклаш каласен коден. Тимирьян павай аважын мутшым тачысе кече мартеат шукта.

Тимирьян Биктимиров ден Кӱлемыш Тимаева ватыже келшен илат. Вич йочам куштеныт да уныкаштымат куанен ончат.

Тыгай кӱлешан пашам шуктен шогымыжлан пеш кугу таум ойлена да тазалыкым, пиалым тыланен кодына. Тудо ял калыклан пример улеш.