Л.Е. Гайнитдинова 1963 ий 18 ноябрьыште Бирск районысо Курмызак ялеш шочын. Йоча жапше кугу, поро, икте-весым пагалаш туныктымо ешыште эртен. Кужнур кыдалаш школым тунем лекмеке, Уфасе медицина институтышто шинчымашым налын. Студент жап пеш вашке эртен. Дипломым налмеке, 1990 ийыште пӱрымашыже Нефтекамск олашке конден. Тыште Лидия Ефимовна йоча врачлан пашам ышташ тӱҥалын. Ешым чумырен, пелашыже дене Сильвия ӱдырым ончен куштеныт. Кызыт ӱдырышт Санкт-Петербург олаште икшыве-влакым кушташ туныкта.
Шке пашажым сай палыше Л.Г. Акулова 1979 ий 11 ноябрьыште Янаул районысо Тошто Шуадынмучаш ялеш шочын. Шуко икшыван ешыште Луиза Григорьевна эн кугырак лийын, садлан сурт сомыл шукыж годым тудлан логалын. Изинек врач лияш шонен кушкын. Кыдалаш школ деч вара Свердловск кундемысе Асбест олаште медицина колледжым тунем лектын. Тудымат пӱрымаш корныжо 2003 ийыште Нефтекамск олаш конден. Самырык ӱдыр йӧратыме пашажым уло кумылын шукташ тӱҥалын. Герман пелашыж дене Руслан эргыштым да Кристина ӱдырыштым куштат.
Уста, пашаштым йӧратыше, пагалыме Лидия Ефимовна да Луиза Григорьевналан тазалыкым, у шинчымашым да еш пиалым тыланен кодына.