Пагалымашым пашашт дене суленыт

Октябрина Ивановна Миннебаева 1985 ий гыч тачысе кече марте XXII партсъезд лӱмеш колхозышто дояркылан тырша. Ава-ачажын суртышто кушмыж годымак кажне пашажым шот дене, кыртмен пижын ыштен. Краснокам  районысо Чавай ял гыч Лапкашорыш марлан мийымек, тудым ик арня гыч ушкал фермыш пашаш ӱжыныт. Шуктен ыштыме пашан лектышыжат сай лиеш: ушкалым лӱштен налме шӧржӧ кечын огыл гынат, арня, тылзе гыч утыр ешаралтын. Тыршымыжым ужын, озанлык  вуйлатыше-влакат пашажым акленыт. Ожнат, кызытат дояркын пашаже нигунам куштылго лийын огыл. Тачысе кечын тудым механизироватлыме гынат, ныл шагат эрдене кынелын, йӱран, луман годым, чатлама йӱштыштӧ шокшо пӧрт гыч лектын, фермыш ошкылман. Каныш але пайрем кече лийже - ушкалым садак лӱштыман. Октябрина районыштынат ончыл доярка улеш, а ешыштыже - пелашыжлан ӱшанле йолташ, пагалыме шешке да йӧратыме ава. Александр Cеменович пелашыж дене кум икшывым ончен куштеныт. Руслан, Радион эргышт-влак да Людмила ӱдырышт кажныже шке ешышт дене илат, ава-ачам поро увер дене куандарат. Октябрина Ивановнам  пошкудыжо-влакат, вуйлатышат пагалат, ял калыкшат кугешна. 

Лапкашор ялысе фельдшер-акушер пунктым вуйлатыше Анюта Сергеевна Андриева - районысо фельдшер-влак коклаште эн кугу стажан пашаеҥ. Ял калык тудым, пагален, «Анюта акай» але «кокай» манын саламлалтеш, полышым йодын мият, тауштат. Тудо шке пашажым чон пуэн, йӧратен шукта. Ялысе кажне айдемын тазалыкше нерген пала, кӱлеш полышым пуа але эмлаш колта, пайдале каҥашым темла. Алексей Андреевич пелашыже Красный Октябрь тӱҥалтыш школышто, вара Лапкашорышто тӱҥалтыш класслаште йоча-влакым туныктен. Ялын историйжым, тукымвожым шымла да кушкын толшо тукымым палдара. Тыршен, келшен ила Андриевмыт еш. Эн кугу ӱдырышт - Алла - аважын пашажым умбакыже шуя. Школым шӧртньӧ медаль дене тунем лектын. Мединститутыш пурынеже улмаш, но «Латвич ияш веле улат, ийготет але ок сите» (Тунемаш вич ияш пурен улмаш.) манын каласенытат, документшым мед-училищыш пуэн. Тачысе кечын Алла республикысе клинический больницыште медсестран сомылжым шукта. Аида ӱдырышт ден Альверий эргышт ачаштын корныжым умбакыже шуят - туныктышо улыт. Альверий Базитамак школышто физика ден математикым, Аида Дӧртыльӧ район Чишма школышто химий ден биологийым туныктат. Алексей Андреевич ден Анюта Сергеевнан куд уныкашт уло. «Бирск оласе медучилищым тунем лекмемлан 46 ий эртыш. Сулен налме канышыште улам гынат, алят фельдшер сомылым шуктем. Пелйӱд але кечывал, лум але йӱр - полыш кӱлмӧ верыш эре миен шуаш тыршем, вет кажне черле мыйым ӱшанен вуча. Ӱшан тул эре йӱлышаш», - ойла Анюта Сергеевна. 

Таза, эсен, кужу ӱмыран лийза, пагалыме землякем-влак!