Полышыжо эре кӱлешан

Пӱнчер ялем, мыйын шонымаште, моткоч пиалан, вет тыште ответственный, шке сомылжым йӧратыше фельдшер Н.А. Алексеева пашам ышта. Надежда Александровна 1968 ий 5 майыште Пӱнчер школын ончычсо директоржо А.С. Сайсановын ешыштыже шочын. 1983 ийыште кандашияш школым тунем лекмеке, Пӱрӧ оласе медучилищыш тунемаш пурен, а 1987 ийыште шочмо-кушмо Пӱнчер ялыштыже фельдшерлан ышташ тӱҥалын. Надежда Александровнан медициныште тыршымыжлан шушаш ийын кумло вич ий лиеш. Тудо шке шочмо ялыштыже марлан лектын. Э.А. Алексеев пелашыж дене кум ӱдырым ончен куштеныт, кум уныкашт уло. 

Мыланна Надежда Александровна дек ятыр гана полышым йодын мияш логалын. Тудын деч нигӧ тореш але уда шомакым колын огыл. Эре порын мутлана, ӧпкелыде, шылталыде полшен шога. 

У ий пайрем вашеш Надежда Александровналан таум каласыме шуэш. Тазалыкым, кужу ӱмырым тыланена. Надя акай, калыклан порым ыштымет шке декет ятыр гана  ешаралтын пӧртылжӧ. Куштылго огыл пашатым ял калык гына огыл, вуйлатыше-влакат кӱкшын аклышт.