Марий водитель - «Роснефтьын» эн уста пашаеҥже!

Конкурсышто пашам ыштыме предприятийын чапшым аралаш индеш кундем гыч эн уста водитель-влак миеныт. Легковой, грузовой машинан да автобусын шофержо-влак  кум категорийлан шелалтын таҥасеныт. Регион-влак гыч кажне категорийыште кум участник лийын. Юрий грузовой автомобильым кондыштарыше 27 конкурсант коклаште теорий да практика заданийым эн сайын шуктен да икымше верым налын! Тудлан дипломым да 250 тӱжем теҥгелан сертификатым кучыктеныт. Мыланна, Илиш район Октябрь ял калыклан, тиде куанле увер! 

Юрийын сеҥымашыже - аваж ден ачажланат кугу куан.

Ачаже, Алеш чӱчӱ, сулен налме канышыш кайымешкыже, тӱрлӧ машина дене пашам ыштен. Техникым сайын пален, садлан машинаже корнышто ӱшанле йолташ лийын. Илалше шофер-влакын ойлымышт гыч, корнышто пудыргеныт гын, нигунам коден каен огыл - ачалаш полшен, керогазше дене шокшо кочкышым ямдылен, сийлен.

Юрий техникым чот йӧрата. Кеч грузовой, кеч легковой машина - тудлан эре капот йымак пурен ончалаш кӱлеш. Пуракан гын, волгалт шинчымешкыже мушкеш, ӱштеш. Шочмо суртыш пӧртылмыж годымат ыштышаш сомылжым шукта да гаражыш ачажын машинажым ончалаш вашка. Кеч-могай пашам шот дене шукта. Армий деч вара Дӧртыльӧ АТП-ште маршрут автобусым кондыштарен. Туштат тудын пашам сайын, тыршен ыштымыжым палемденыт. Тулеч вара Юрий «Роснефть» компанийысе УТТ-ш куснен. Вакуумный установкын водительже улеш.

Юрий да Алиса пелашыже  кок ӱдырым - ныл ияш Дашам да кок ияш Полинам - ончен куштат. Яра жапышт лийме годым шоҥгемаш тӱҥалше авашт-ачашт дек толын каяш тыршат. Теве тыгай тыматле, поро, техникылан шӱман, ава-ачам, ешыжым йӧратыше, эре весела кумылан улеш Юрий. Ончыкыжымат у сеҥымашым, тазалыкым тыланена!