Все новости

Айдемым паша чапландара

Л.В. Сайпушева (Изибаева) Арлан ялеш 1961 ий 25 октябрьыште шочын. Ава-ачаже Валентина Ильясовна ден Виталий Изибаевич Изибаевмыт колхоз пашаште тыршеныт, вольыкым онченыт, пакчасаскам куштеныт. Ныл икшывым йол ӱмбак шогалтеныт. Люда, кокымшо икшыве, аважын тӱҥ полышкалышыже лийын: пӧрт сомылым шуктен, изи шольо-шӱжарым эскерен. Икшыве-влак изинек пашаш шуаралт кушкыныт. 1979 ийыште, Арлан кыдалаш школым тунем пытарымеке, Нефтекамск оласе 76-шо номеран училищыште шӱртым тӧрлышылан (ровничницылан) тунемын. Йошкар диплом дене тунем пытарен, кум ий хлопкопрядильный фабрикыште тыршен, но чонжо ялышке пӧртылаш ӱжын.1983 ийыште Арлан школышто лаборантлан ышташ тӱҥалын.

Авторын колтымо фото.  Л. Сайпушева.
Л. Сайпушева. Фото:Авторын колтымо фото.

1991 ий июнь тылзыште Борис Александрович Сайпушевлан марлан лектын. Кумло ий пырля келшен илат. Можара ялыште мотор кермыч пӧртым ыштен шынденыт, 2001 ий годсек тушто илат. Ныл икшывым ончен куштеныт.

Катя ӱдырышт ешыж дене Нефтекамск олаште ила, кок эргыже уло. Тудо Уфасе экономика да сервис академийым тунем пытарен, туризм шотышто специалист улеш. Игорь эргышт Нефтяной техникум деч вара Екатеринбургышто Урал кугыжаныш университетым тунем лектын, электричестве шотышто специалист улеш, йӱдвелне пашам ышта. Елизавета Москвасе кугыжаныш областной университетыште тунемын, англичан да китай йылме туныктышо лийын, Москваште ила. Нуно чыланат отличиян дипломым налыныт. Эн изишт, Мария, школым отлично тунем пытарен, кызыт Омскысо кугыжаныш технический университетыште икымше курсышто шинчымашым пога.

Йӧратыме паша

Арлан ялысе модельный библиотеке клуб пелен верланен. Тушко изижат, кугужат  куанен коштыт. Людмила Витальевна лудшо-влакын кумылыштым савырен мошта: воштылалын саламлалтеш, эрташ ӱжеш, порын мутланен колта. Толшо еҥ-влакым у книга-влак дене палдара, оҥай мероприятийлам эртара. Йоча ден кугыеҥ-влаклан тӱрлӧ конкурслаште шке вийыштым тергаш темла. Шкежат ӧрдыжеш огеш код. Сеҥышыш лекме Чап грамотыж ден дипломжым шотлен пытарашат огеш лий. Библиотекарь книгам лудаш моткоч йӧрата да йоча-шамычымат книгалан шӱмаҥда. Изирак-влак дене йомакым йӱкын лудыт, лудмо почеш модышым эртарат, чайым йӱыт. Библиотеке пелен тӱрлӧ кружок пашам ышта: илалше-влаклан - «Кидпаша», кугурак ийготан йоча-влаклан - «Ош памаш» краеведений кружок, шашке да шахмат дене модмаш.

Кастене, паша деч вара, кугыеҥ-влак чӱчкыдын библиотекыш погынат. Шарнымаш касым тарватат, «Шорыкйол», «Ӱярня», «Кугече», «Семык» пайрем-влак нерген мутланат да эртарен колтат (Чаманен каласаш логалеш, толын лекше черлан кӧра библиотекыште илыш вашталтын. Тушко ынде справке деч посна пураш огеш лий).

Ынде лучко ий утла Людмила Витальевна уло кумылын «Кӱдыроҥгыр» ансамбльыш коштеш. Калык мурым, куштымашым йӧрата. Ансамбльын выступленийже деч посна ик пайремат ок эрте. Конкурслаште участвоватлат, яллашке концерт дене лектын коштыт.

Людмила Витальевнам районыштат моктат. Тудын пашаже республикысе профсоюз организацийын, районысо администрацийын, культура пӧлкан, ветеран организацийын, ялсовет администрацийын Чап грамотышт дене палемдалтын.

Паша стажше 42 ий, тушеч 32 ийже библиотекыште ышта. Пашажым уло кумылын шукта. Людмила Витальевнам ял калык пагала, тудын нерген эре поро мутым гына ойла. Айдемым паша чапландара, маныт калыкыште.

Л.В. Сайпушева - поро чонан, шыма койыш-шоктышан, ушан-шотан, пашам йӧратыше еҥ, ӱшанле пелаш, йочажым чаманыше, йӧратыше да полшышо ава, иза-шольо-влак дене келшен илыше шӱжар да ака, аважлан умылен моштышо эҥертыш. Кугу Арлан ялыште теве тыгай ӱдырамаш ила. Ме тудын дене кугешнена. 25 октябрьыште тудлан 60 ий теме.

Людмила Витальевна, пӱтынь Арлан да Можара ял калык тыйым юбилей кечет дене шокшын саламла. Вий-куатет ешаралт шогыжо, уш-акылет тыгаяк яндар да пӱсӧ лийже. Пеҥгыде тазалыкым, кужу ӱмырым тыланена.

Ӱмыр кечым тый ит шотло,

Тек кая, куржеш, йога.

Лийже икте - чон куанлык,

Поро кумыл, чын паша.

Автор:В. ИСАЕВА. Краснокам район.
Читайте нас: