Йӧратыме сомыл чоным куандара

Акарт кундемын ӱдыржӧ В.Б. Аптыкаева Ардаш ял книга пºртыштº 30 ий утла пашам ышта. Книгагудо тудлан шочмо суртшо гай лишыл - кажне эрдене тушко куанен ошкылеш.

Паша корныжо тыштак тӱҥалын. Икымше паша кечыжым тачат порын шарналта. Ардаш ялыште шочын-кушшо ӱдыр школышто тунеммыж годым лудаш да сочиненийым возаш йӧратен, сандене туныктышо лияш шонен. 1983 ийыште Благовещенск педагогический училищым тунем лектын.

«Профессийым ойырен налме годым йоҥылыш лийын омыл манын шонем. Ардаш кыдалаш школышто практикым эртыме годым йоча-влакым шуко йомак книгам лудаш, тӱрлӧ сценкым шындаш туныктенам, шкежат ял библиотекыште чӱчкыдын шинченам, шуко лудынам. Тунам библиотека гыч книгам налын лудшо ятыр лийын: студент, туныктышо, ял озанлык пашаеҥ-влак коштыныт. Нунылан тӱрлӧ книгам, журналым кычал муаш тыршенам. Библиотекыште тӱрлӧ мероприятийым эртараш полшенам, ятыр сценарийым возенам. Тунамак тушто пашам ышташ келшен», - каласкала Вера Байназовна.

Самырык специалист улмыж годымак пӱсӧ уш-акылан, виян лияш, кеч-могай чаракым лӱдде эрташ тунемын. Кызытат чылажымат шот дене ышташ тырша.

Тудын кидше гоч шуко марла, рушла книга эртен, кажне книган данныйжым возен налын, каталогышко пуртен.

Вера Байназовна, ялысе клуб пашаеҥ-влак, администраций, школысо туныктышо коллектив дене келшен, каҥашен, пашам ышта. Библиотекыште тӱрлӧ мероприятийым эртара, клубышто лийшыжымат кажныжым келыштараш полша.

«Коллективыште сай еҥ-влак пашам ыштат. Чыланат марий улыт. Нунын дене ик умылымашыш шуынам, ме чыланат ваш полшен ыштена. Кажне мероприятий шкешотан, но ваш полшымаште - вий», - каласкала Вера Байназовна.

Библиотека системыште шуко ий тыршымыжлан В.Б. Аптыкаевам 2016 ийыште Башкортостан Республикын Культура министерствыже Чап грамот дене палемден. Мутат уке, тиде кугу сеҥымашыш шумым ончыкта да эше утыр сайрак пашам ышташ вийым пуа.

Айдемын кӧргӧ чонжым почаш, тӱрыс умылен шукташ куштылго огыл, а тиде ӱдырамашым вигак пален налаш эшеат нелырак. Но таче мастар еҥ чон йодмо семын сценыш лектеш, калык ончылно шке кумылжым тӱрыснек ончыкта.

Вера Байназовнан ялысе библиотекыште пашам ыштыме жапше - тудын гына огыл, Ардаш ял марий-влакын чапланыме пагытышт. Шӱм-чон гыч йоҥгалтарен лукмо мутшо, виян да яндар йӱкшӧ, пӱртӱсын пӧлеклыме кап-кыл моторлыкшо - сценыш лекмыж годым кажне гана калык чоным куандара. Тудо поро ава, шыма кумылан кувава, сай озавате. Пиалан тудо айдеме, кӧн шӱм-чон йодмо паша корныжо пайдалын шуйна, калыкын чон йодмыжым шукта.