«Илышыштем нимолан ом ӧкынӧ», - ойла йоча врач Г.А. Ушакова

Галина Алексеевна Ушакова - районышто чылалан палыме еҥ. Йоча врач, кӱкшӧ квалификационный категориян специалист, паша стажше - 40 ий, Мишкан район больницыште 38 ий тырша, тушеч 14-шым тӱҥ врачын алмаштышыжлан ыштен.

Ме тудын дене латкок-латкум ий ончыч пеш оҥай ситуацийыште лишкырак палыме лийынна ыле. Вашке пычкемышалтше пургыжан теле кастене Уфа гыч мӧҥгӧ толын пурышым. Ончем, ватем дене Галина Алексеевна мутланен шинчат. Саламлалтна.

- Толын шуыч, корно пеш алама дыр? - пелашемын куаналше йӱкшым колам.

- А Генаже кушто? - ӧрмалгенрак пелештыш Галина Алексеевна.

- Мый Гена, Гена Изибаев улам, - вашештышым.

Чыланат икте-весе ӱмбак тӱткынрак ончална да кузежым-можым садешак умылышна, а Галина Алексеевна воштыл-воштыл каласкалаш тӱҥале. Тудо Монар ялыш унала миенат, корно петыралтмылан кӧра тугларжым Нергыш шумеш имне дене луктын кодаш йодын улмаш. Мишкан гыч эрге-шешкын машина дене налаш толмешкышт, Гена деке пуртен кодаш шӱден. «Эше Славик туглар деч, школышто ыштыше Генам палет манын, ойырен йодым. А тудо пеш сайын палыме нерген ӱшандарен каласыш», - ойла унана.

А мемнан суртна Байгазов Генан деч тораште огыл, кок пӧрт коден веле, верланен. Ешартышлан коктынат шукерте огыл гына кермыч дене икгайрак у пӧртым ыштен лектынна ыле. Седыге унана поранан кастене ик Гена олмеш весе деке логалын.

Тиде вашлиймаш деч вара икте-весынам пеш сайын палена, да мый эре «Салам, Галина Алексеевна, мый - Гена Изибаев», - ышталам. «Салам, салам, пеш сай палем», - вашешта тудо.

Таче Г.А. Ушакова дене эше ик гана мутланаш сай амал уло, 26-шо ноябрьыште тудо 65 ийым тема. Лӱмгечыже вашеш Галина Алексеевнам илыш-корныжым тичмашрак почын пуаш ятыр йодышлан вашешташ йодым. Теве мо нерген тудо каласкалыш.

- Йоча годсым шарнымаш кеч-кӧмат волгыдо да весела жапыш пӧртылта. Мый ешыште ик икшыве гына ыльым, эре шӱжарым але шольым вученам. Нунын дене пырля модаш, ача-аван кӱштымӧ сомылым шукташ, пакчаште шӱкым сомылаш, вӱдым шаваш, пу артанам опташ, кролик-влакым ончаш, шоптырым погаш (тудыжо мемнан пешак шуко лийын), моло сомылым ышташ лиеш, шоненам. А тунам мый чыла тидым шкетын ыштенам.

Ачам - Алексей Айнулинович Айнулин - Кугу сарын участникше, пеҥгыде койыш-шоктышан, требовательный, уста, шӧртньӧ кидан пӧръеҥ ыле. Тудын деч мый шукылан тунемынам, тӱрлыжымат ыштылаш йӧратенам. Шарнем, икана Таня Баюршина йолташ ӱдырем дене коктын, «Пионерская правда» газетысе чертежым ончен, катамараным ыштышна да Инак эҥерыш волтышна. Ийын коштмынам ужын, ялысе чыла йоча да кугыеҥ-влак чот ӧрыныт. Ачамак мотоцикл да машина дене кошташ кумылаҥдыш. «Урал» мотоцикл дене 12 ияш кудалышташ тӱҥальым, а машина руль воктек икымше гана 17 ияш шинчым. Тунамсе жапыште автомобильым кондыштарыше ӱдырамашым кундемыштына ужылтын огыл. Районышто шоферлан ыштыше ӱдырамаш-влак коклаште Шаде Шогертен гыч Римма Головком гына шарнем. Легковой автомашина дене, правалан тунем лектын, эн ончыч мый кошташ тӱҥальым.

Авам деч ӱдырамаш сомыллан шуко тунем кодынам. Тудо тамле кочкышым ямдылаш, тӱрлӧ пакчасаскам шинчалтылаш, мелнам да когыльым кӱэшташ, ургаш, кидпашам ыштылаш мастар ыле. Мыйымат шукылан туныктен.

Школышто мый куштылгын тунемынам. Мылам тунемаш чот келшен. Урокым ямдылыме годым «зубритлен» шинчен омыл. Йӧратыме предметем-влак физика, математика, рисований, черчений ыльыч. Ушем дене архитектор лияш шоненам, но илышыште ачамын врачлан туныкташ шонымыжо шукталтын. Ынде 40 ий йоча-врачлан ыштымек, тудын ончыктымо корныжо чын лиймым сайын умылем.

Пелашем - Петр Александрович Ушаков (Ишимбай гыч руш рвезе) - хирург. Тудын дене студент жапыште палыме лийна да институтыштак ешым чумырышна. 38 ий келшен, икте-весым йӧратен, ваш-ваш пагален илышна… Кок икшывым ончен куштенна, Дмитрий эргына - врач-хирург, Олеся ӱдырна - туныктышо. Ныл уныкана уло.

Вачӱмбалнем - 65 ий, пашамым эше кудалтен омыл. Тынар ияш улылтеш гынат, шинчымашым эре пойдараш тыршена, курсыш, семинар-влакыш коштына.

А паша биографием мыйын Уфа оласе 13-шо эмлымверыште йоча отделенийыште тӱҥалын. Тау, кугурак коллегем-влак эре полшен шогеныт. Тыгай шуко профилян, виян эмлыме рӱдерыште кок ий опытым погымемым кугу пиаллан шотлем.

Ик шот дене таче марте пиалан илыш-корным эртенам, нимолан ом ӧкынӧ, илышыштем чыла шонымашем шукталтын. Ончыкыжым уныкам-влак, кушкын шуын, сай айдеме лийышт манын тыланем. Тек нунымат сай пашаштлан еҥ-влак пагалаш тӱҥалыт.