Автобус вашка ола уремлаш…

Чатка ош тувырым чиен, галстукым пижыктен, олан уремлаж дене автобусышто пассажир-влакым шупшыктышо водитель-влакын пашашт, ӧрдыж гыч ончымаште, - чылт романтика. Туге гынат нуно калыклан кӱлешан пашам шуктат. А.А. Захаров, Бирск район Реве ялын шочшыжо, БР «Башавтотранс» ГУП-ын филиалыштыже - Нефтекамск оласе ПАТП-ште латныл ий автобусым виктара. Тудо ола мучко 8-ше да 9-ше маршрутла дене кудалыштеш. Алексейын ятыр ий тыршен ыштымыже, предприятийжылан ӱшанле улмыж нерген БР Транспорт да корно озанлык шотышто кугыжаныш комитетын, Нефтекамск ола администрацийын, «Башавтотранс» ГУП-ын, верысе ПАТП-н Чап грамотышт, ятыр тауштыме серыш-влак палдарат. Водитель-влакын пайремышт вашеш Алексей Захаров дене пашаж нерген мутланышна.

- Алексей Альбертович, тиде профессийыш кузе логалында?

- Мый автотранспортым виктараш армийыште, Саратов оласе авторотышто службым эртымем годым, кумылаҥынам. Тушто мылам КамАЗ-ым кондыштараш ӱшаненыт. Пӧртылмеке, Бирск оласе учебно-курсовой комбинатыште (БРУКК) «Д» категорийлан тунем лектым.

«ВС» категорий-влакым эше армий марте, Нефтекамск оласе 138-ше проф-училищыште автомеханиклан тунемме жапыште налынам. Армий деч вара вигак «Баш-автотранс» ГУП-ыш пашаш пурышым, таче мартеат ыштем.

- Автомобильым виктараш ик шот. А тыгай кугу транспортым - автобусым - кондыштараш неле мо?

- Паша физически неле огыл, рульым пӱтыраш нимо йӧсыжат уке. Тунемат гын, куштылго, легковой автомобильым виктарыме гаяк. Морально ноялтеш. Психологически напряженный паша. Вниманий пӱсӧ лийман, корнысо, автобус салонысо ситуацийым - икманаш, ончылно, шеҥгелне мо ышталтеш - чыла ужын, аклен, эскерен шуктыман. Тӱҥжӧ - автобусышто тый шкетын отыл, шеҥгелнет калык улмым шарныман. Корнышто шоҥгыеҥжат, йочажат коштыт, садлан чыла шотыштат моткоч тӱткӧ лийман.

- Пассажир-влакат тӱрлӧ вашлиялтыт, очыни…

- Тидын шотышто стрессым чытышан лийман. Южылан эркын кайыме ок келше. Я кузе ончалметат сырыктен кертеш. Тугайжым, кеч пассажир йоҥылыш улеш гынат, лыпландараш тыршем.

- Профессий дене кылдалтше привычкыда уло мо?

- Индеш шагатеш малаш возам. Эрдене вич шагатлан кынелман, медкомиссийым эртыман, а куд шагат эрталтен рейсыш лектам. Садлан отпускышто лийме годымат куд шагат эрдене кынелам, куд шагат деч вара омо уке.

- Кечеш чылаже мыняр рейсым ыштеда?

- Смена дене ыштыме годым (ик автобус дене график почеш кок водитель коштеш.) латкок-латкум рейс лиеш. Кечыгут шкетын коштмо годым латкуд рейс погына.

- Экстремальный ситуацийыш логалында мо?

- Корнышто тӱрлыжат лиеда. Икана олан уремлаж дене кудалме годым автобусышто самырык ӱдыр шкем удан шижаш тӱҥале, «Вашкеполышым» ӱжыктышна, утарен шуктышт.

- Пассажир автобусын водительже могай койыш-шоктышан лийшаш?

- Нервыже пеҥгыде лийман. Адекватный айдеме. Кечыгут шинчен, корнышто кандаш-индеш шагат рульым виктараш, эреак ик маршрутым «пӱтыраш» - тидым чылан огыт чыте. Пашаш пураш толшо южо водитель-влак эсогыл кок арня стажировкым сеҥен огыт керт, каят. Адакшым кажне рейсым ойырымо жапыште савырнен шуктыман, паша графикым, сменым чыла эскерыман. Мутлан, 8-ше маршрутын ик рейсшым 35 минутышто, 9-ше маршрутым 40 минутышто «савырнен» етшыман. График деч изиш кораҥмым але вараш кодмым пеҥгыдын текшырат.

- Шинчымашым, моштымашым чӱчкыдын тергат?

- Идалыклан кок гана - шошым да шыжым - корныласе правилым палыме шотышто предприйыште внутренний экзаменым сдатлена. А автобусын тӱз улмыжым кечын рейсыш лекме деч ончыч да вара автомеханик терга.

- Пассажир автобус водитель-влаклан иктаж льгото-влак улыт мо?

- Кӧ коло ий олаште автобусым кондыштара, пенсийыш вич ийлан ончычрак лектеш.

- Оҥай мутланымашлан тау! Шушаш пайрем дене. Корныда куштылго лийже!

Читайте нас:

Новости партнеров

Лена ханым: "Улымды онотмайҙар"

На уровне молекул

Салкын тигәндә мунча керергә ярыймы?

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».