Нуно чоҥымо пӧртым сӧрастарат

«Стройзаказчик» предприятий Нефтекамскыште веле огыл, уло Башкортостан Республикыште чоҥышо кугу организаций семын палыме. Тудо тӱҥ шотышто калыклан шуко пачашан илыме пӧрт-влакым чоҥа. Кызыт олаште интернат-школым уэмдыме, 25-ше микрорайонысо Карцев уремыште шуко пачеран пӧртым чоҥымо пашам ворандара. Чоҥымо пашаште утларакшым пӧръеҥ-влак тыршат гынат, тудын кокымшо йыжыҥжым - отделкым - ӱдырамаш-влак шуктат. Карцев уремысе у объектыште паша изишланат ок лыплане - эрже-кечыже тарватыме куткышуэм ушештара: пашазе-влак я подъездыш плиткым нумалыт, я сварке мӱгыра, я ик пачаш гыч весыш цементым темыме ведрам нумал эртат. «Ме тиде пашалан шукертак тунем шуынна. Тудо шагал огыл кап-кыл вийым, чытышым йодеш гынат, кунам объектым сдатлена, чоным каласаш лийдыме куан кумыл авалта. Шуктымо пашанам ончен йывыртена, да чыла нойымаш мондалтеш. Мӧҥгыштӧ каныш кече годымат яра шинчыме ок шу. Кидыш ик жап мастерокым огына кучо гын, пуйто ала-мо ок сите гай чучеш - пашаш писынрак толын, ыштылме шуэш», - шыргыжал каласкалат тиде пӧртыштӧ отделкым ыштыше марий ӱдырамаш-влак.

А. Ишметова, Калтаса район Кӱшыл Качмаш ялын шочшыжо, «Стройзаказчик» МУП-ышто коло ий наре тырша. Алевтина Валерьевна, 1989-ше ийыште 27-ше профлицейым тунем лекмеке, БНПС-ын 2-шо чоҥышо управленийыштыже (СУ-2), вара «Интеграл» АО-што тыршен. Объектыш мийыме кечын тудо «чистовой» отделкым ышта - кандашымше ден индешымше пачаш-влак коклаште тошкалтыш воктенсе пырдыжым, туврашым тӧрла ыле (Тиде пӧртысӧ пачер-влакым «черновой», а подъезд-влакым «чистовой» отделкым ыштен сдатлат.). Икте подъезд пырдыжым сӧрастара гын, весе тошкалтыш кокласе кӱварыште плиткым опта. Тиде сомылым Л. Демьяновалан ӱшаненыт. Тудо Краснокам район Ӱлыл Такия ял гыч улеш. «Нефтекамскыш ял гыч 1990-ше ийыште тольым. Оласе 47-ше проф-училищыште кум ий маляр-штукатур лияш ямдылалтым, нылымше разряд дене тунем лектым. Кокымшо курсышто Салават олаш профессий дене усталыкым тергаш конкурсыш намиеныт ыле. Кызыт визымше разряд дене пашам ыштем. Тулеч вара «Уралстройсервисыште», автозаводысо ЖЭУ-што тыршенам. «Стройзаказчикыште» латкокымшо ий ыштем. Малярат, штукатурат, плиточникат улам - чыла ышташ логалеш», - ойла весела кумылан Лилиана Валериановна. Тудо «Стройзаказчик» предприятийын чапшымат арален. Чишма поселкышто эртыше профмастарлык конкурсышто шуаралтын - обойым клеитлен, визымше верыш лектын. Янаул оласе профмастарлык конкурсышто пырля пашам ыштыме Н. Сапаева дене плиткым оптеныт да кокымшо верым сеҥен налыныт. А 2018-ше ий мучаште тудым пашам ыштыме организацийже гыч Уфа олаш тунам эше республика Вуйлыкын пашажым шуктышо Радий Хабировын Посланийым йоҥгалтарыме погынымашыш колтеныт.

…Шымше пачашын балконыштыжат ӱдырамаш-влак койылалтышт. Нунат марий улыт. Тиде изи мӱкш гай пашаче А. Хасанова ден С. Изибаева тыршат. Нуно балконысо кӱварыште цемент вартышым чаткан оптат - кӱварым «заливатлаш» ямдылат ыле. Тыштат пашам шот дене шукташ чыла технологийым палыман. Ангелина Ивановна - Краснокам район Ушмен ялын шочшыжо. 27-ше профлицейым тунем лектын. «Стройзаказчик» МУП-ышто латкок ий тырша. Коло шым ияш Светлана Валентиновна предприятийыште кум ий ышта. «Профессием мылам келша. Кугурак коллегем-влакын полышыштым эре шижам. Полшат», - каласыш тудо. Калтаса район Калмиямучаш ялын ӱдыржӧ оласе 27-ше проф-лицейым тунем лектын. Коло шым ияш ава кок икшывым кушта.

Ӱдырамаш-влак штукатур-маляр улыт гынат, урем гыч подъездыш плиткымат нумалыт, цементым але моло вартышым темыме ведрамат ик пачаш гыч весыш кӱзыктат - икманаш, отделка пашам чыла шкеак ворандарат. Пырдыжым штукатуритлат, вара маляр пашалан пижыт - «черновой» отделкым шуктат. Подъездлаште «чистовой» отделкат нунын вачӱмбалне. Чыла шот дене, чаткан, моторын ыштен шуктыман, объектымат палемдыме жапыште сдатлыман. Грузчикат лияш логалеш - материалым, ӱзгарым шкеак нумалыт, декоративный штукатуркымат оптат. Социальный пӧртыштӧ обойымат шке клеитлат. Нунылан школлаште, йочасадлаште чӱчкыдын ачалыме пашам ышташ ӱшанат. Илыме пӧртласе подъезд-влакым шотыш кондат. Ӱдырамаш-влакын мутышт гыч, ик идалыкыште тиде организаций кокла шотышто эн шагалже ныл, эн шукыжо шым объектым - чоҥымо у пӧртым - сдатла.

Паша жапыштыже да кӱлеш семын шукталтше манын, бригадым, шеледен, икмыняр объектыш колтедылыт. Самырыкше кугурак деч тунемеш, кугуракше самырыкын полышыжлан эҥерта. Объектыште тудо кечын вашлийме мастер

Э.Х. Хабибуллина ӱдыр-влакын пашаштым сай могырым палемдыш. «Бригадыште марий ӱдыр-влак шукын улыт. Чылан пашам сайын ыштат. Нуно тӱрлӧ сомылым шуктат. Эр гыч кас марте мӱкш гаяк тыршат», - каласыш тудо. «Пашадарлан вуйым огына ший. Тӱҥжӧ - тудым жапыштыже тӱлат. Ынде чия-влакат ончычсо гай огытыл - тазалыклан кугу эҥгекым огыт кондо, водоэмульсионный улыт. Но «вредностьлан», конешне, садак тӱлат. Телым, игече йӱштылан да отоплений укелан кӧра, пашам ышташ йӧсырак. Туге гынат ме нелылыклан вуйым огына пу. Пашанам йӧратена», - ойлат чоҥышо ӱдырамаш-влак.

Туге, ӱшаныме сомылым шуктен, икте-весылан полшен ыштет гын, нимогай йӧсылык лӱдыкшӧ огыл. А лектышыже эре куандарыше. Мотор пӧрт-влакым чоҥымашке нине поро кумылан марий ӱдырамаш-влак шагал огыл вий-куатыштым, пӱжвӱдыштым, усталыкыштым пыштат. Тыршымышт арам огыл: Нефтекамск оласе у микрорайонышто йӱр деч вара шочшо поҥгыла койын шогышо шуко пачашан чапле у пӧрт-влак, мӱндыркӧ волгалтын, олан кушмыжо, тӱзланымыже нерген палдарат.

Р. Никоновын да Л. Шавалиеван фотошт-влак.

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».