Пашаче кумылан кажне еҥ пашам муын кертеш

Шукерте огыл санаторийыште каныме годым мый марий ӱдырамаш-влак дене палыме лийым. Мутланен-мутланен, кушто пашам ыштымыштым, кушеч улмыштым рашемдышым. Иктыже - Бирск район Памаш ялеш шочын-кушшо да туштак ешыж дене илыше Елена Ачукова, весыже - тиде районысо гычак Реве ялын шочшыжо Лариса Тазеева, Дӧртыльӧ районысо Йывачъялыш марлан лектын.

Елена Васильевна - ныл икшыван ава, кок ӱдыржӧ да кок эргыже кушкын шогалыныт, илышыште шке верыштым муыныт. Лариса Борисовнанат эргыж ден ӱдыржӧ пашам ыштат. Ӱдырамаш-влак Дӧртыльӧ районысо Москово селаште верланыше «Калинина» ООО-н фермыштыже дояркылан тыршат. Пашам сайын ыштымыштлан озанлык тугок путевкым пуэн да санаторийыш канаш колтен. Ончыч шке ялыштышт ферме улмо годымат доярке лийыныт. Кызыт кажне кечын Памаш ял гыч 5 дояркым эр-кас автобус дене фермыш шупшыктат, а Йывачъял гыч тушто 3 еҥ пашам ышта. Нунылан легковой автомашинам ойыреныт.

«Ялыште, паша уке манын шинчет гын, мо дене илет? Эше пашана палыме, садлан нелылыкым огына шиж. Чыла паша автоматизироватлалтын, шӧрым ожсо гай ведра дене нумалман огыл», - каласкалышт Елена ден Лариса. Пашадар шотыштат вуйым огыт ший, кугытшым ойлаш айманышт, но «сайын тӱлат» маньыч. Чыла пашаеҥлан тичмаш соцпакет, тӱрлӧ льгот уло: больничныйым тӱлат, вольыклан олымым, кӱлеш гын, шурнымат тугок пуат, идалыклан кок гана спецовкым вашталтат, санаторийлаште канаш путевкым кучыктат да молат.

Ферме вуйлатышын пашажым Йывачъял марий В.Е. Янсубаевлан ӱшаненыт. Тудо Кушнаренко ялозанлык техникумым тунем пытарен, ветеринар специальностьым налын, садлан ветврач сомылымат шуктен шога. Шыжым шинчымашыжым келгемдаш лӱмын курсыш миен толын. Шукырак пален налаш манын, тудын деке телефон дене йыҥгыртышым. Кутырымына гыч теве мо рашеме: фермыште презым шочыктымо сомылым умылышо селекционерышт, тугак зоотехник ден осеменаторат улыт. Тиде фермыште 800 вуй кугу вольыкым ашнат. Тушеч 350-же - лӱштымӧ ушкал, молыжо - пашмак да презе-влак. Ыштен лукмо тӱҥ сатулан (продукцийлан) шӧрым, а тӱҥ пашаеҥлан дояркым шотлат. Кызыт фермыште 7 доярке, презым ончышо 3 еҥ, скотник, тракторист-влак - чылаже, шуко ма, шагал ма, 24 еҥ пашам ышта. Кажне доярке телым кечеш 500-700 литр шӧрым лӱштен налеш, чумыржо 3 тонн деч шуко погына. Ашныме ушкал урлыкшо «шем-ола» маналтеш.

«Озанлыкнан озаже Габдуллин пашаеҥ-влак верч чот тургыжлана. Могай гына сомыл ок шукталт?! У ий, 23 февраль, Ӱдырамаш пайрем, юбилей, Сабантуй годым пӧлекым, Чап грамотым, премийым пуэн куандара. Эсогыл арака йӱмӧ ваштареш кучедалме пашат ӧрдыжеш огеш код. Иктат пашаште аҥырген огеш кошт, дисциплиным чоткыдын куча. Чыла тидыжак мемнам ончыкыжым тыште пашам ышташ кумылаҥда. Кузе тыгай озалан от куане!» - кугешнен каласышт марий ӱдырамаш-влак.

Икманаш, пашаче кумылан еҥ илыме верыштыжат пашам муын кертеш. Кӧ пашам йӧрата да тудын деч ок лӱд гын, паша тудым шке кычал муэш.

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».