Айдеме пашаж дене мотор

Дмитрий Ибашевым Бирск кундемыште илыше-влак коклаште палыдыме еҥ укеат дыр. Моло районышто илыше марий-влакат тудын нерген колыныт, шонем - поро шомак тӱня мучко мардежла писын шарла. Адакше «Чолман» газетыштат тудын нерген ик гана веле огыл возенна. А таче эше ик гана илыш-корныжым кӱчыкын шергалаш сай амал уло - тиде кечылаште Дмитрий Ишмаевич йыргешке лӱмгечыжым палемден.

Д.И. Ибашев - пеш сай доктор, кугу опытан хирург. 1983 ийыште Башкир кугыжаныш мединститутым тунем лекме да интернатурым эртыме деч вара Бирск больницыш хирургий пӧлкаш пашаш толын да кызытат туштак тырша. 2004-ше ий гыч хирургий пӧлкам вуйлата. Россий Федерацийысе да Башкортостан Республикысе здравоохраненийын отличникше, Башкортостан Республикын заслуженный врачше улеш.

Мишкан районысо Тӧргымдӱр ялеш шочын-кушшо Д. Ибашевын молан илышыштыже тыгай профессийым ойырен налмыж нерген йодшашат уке докан. Ешыште кушшо ныл эрге изинек фельдшерлан тыршыше ачаштын, Ишмай Ибашевич Ибашевын, пашажым ужын кушкыныт. Авашт, Ольга Дмитриевна Киселева, Удмуртийысе Ныргынде ялын шочшыже, тӱҥалтыш класслам туныктен. Кугем шогалмек, эрге-влак чылан ачан корныжым тошкеныт. Нижнекамск олаште илыше Александр акушер-гинекологлан, Салаватыште илыше Юрий стоматологлан тыршат, Евгений - ветеринар. Дмитрий Ишмаевичын пелашыжат, Лидия Александровна, илышыштыже ты профессийымак ойырен налын, йоча невролог улеш. Александр ден Юрийынат пелашышт врач улмым шотыш налаш гын, Ибашевмытын врач династийышт нерген ойлаш лиеш. Тудыжо лишыл жапыште эше ешаралтшаш - Дмитрий Ишмаевичын да Лидия Александровнан Георгий эргышт Башкир кугыжаныш медуниверситетыште тунемеш, тудат хирург лийнеже. Кугурак икшывышт, Ян, нефтяной институтым тунем лектын, шке специальностьшо дене пашам ышта.

Хирургын пашажым куштылго манаш огеш лий. Дмитрий Ишмаевичлан нине ийлаште иктаж кандаш тӱжем наре операцийым ышташ логалын. План почеш шуктымо операций деч посна экстремал ситуацият чӱчкыдын лиеда. «Тыгодым писын гына чын диагнозым шынден, мо-кузежым аклен шуктыман. Тӱҥжӧ пациент нерген шоныман, тудлан эҥгекым ыштыман огыл», - ойла тудо. А эше наставник семын мыняр самырык хирурглан шинчымашым да моштымашым пойдараш полшен?! Нунышт Бирск больницыште, республикысе моло олала ден районлаште гына огыл, республика деч ӧрдыжтат тыршат.

Д.И. Ибашев - Башкортостан Республикысе хирург-влакын ассоциацийыштын еҥже, кок ий ончыч Хирург-влакын Российысе ушемыштын действительный членже лийын. Шке паша опытшо дене ик гана веле огыл научно-практический конференцийлаште палдарен. Эмлыме пашаш кызытсе жаплан келшыше инновационный технологий-влакым шыҥдарен шога.

Дмитрий Ишмаевич мер пашаланат шагал огыл жапым ойыра. Бирск муниципальный районын депутатше улеш. «Виче марий» национально-культурный автономийым вуйлата. Тудын ӱшанлын вуйлатыме да йырже чумыргышо мер активын чолган тыршымыж дене олаште да районышто ятыр пайдале, оҥай спорт таҥасымашым, каныш касым да калыклан келшыше пайремым эртарат. Д. Ибашевын ойжо дене Сеҥымаш кече годым ий еда Кугу Ачамланде сарын Геройжо-влак лӱмеш куштылго атлетика дене кроссым, паралимпийский чемпион Кирилл Михайловын призшылан ече фестивальым эртарат. Шочмо-кушмо Мишкан районысо Тӧргымдӱрыштыжӧ Ял пайремым тарваташ шонымыжымат ялчыже-влак дене пырля илышыш шыҥдарен кертын.

Паша да мер сомыл коклаште кузе каналта манын шоналташат лиеш. Очыни, ечыгорнышто. Дмитрий Ишмаевич изинек спортлан шӱмаҥын, кызытат телым арнялан вич гана ече дене, кеҥежым лыжероллер дене куржтал толаш жапым муаш тырша. Тӱрлӧ кӱкшытан таҥасымашлаште вийым терга да ончыл верлам наледа. Йӧн улмо годым пелашыж дене курык гыч ече дене мунчалташ йӧратат.

Теве тыгай ура чонан еҥ ила мемнан коклаште. Шке пашаж дене калыкнам чапландара. Йыргешке лӱмгечыже лӱмеш Дмитрий Ишмаевичлан шкаланжат пеҥгыде тазалыкым тыланыме шуэш. Тек тӱҥ пашадат, мер сомылдат сайын воранен толыт!

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».