Все новости

Республикыште ойыртемалтын

А.И. ШАМШИТОВА, Мишкан район Тошто Эшым ялын шочшыжо, илыш-корныжым туныктымо сомыл дене кылден. Мишкан селасе «Путник» йоча да самырык-влаклан туризм рӱдер тудлан таче кокымшо суртышкыжо савырнен. Тушто ӱдыр методистлан улыжат вич ий веле ышта гынат, тӱвыргӧ паша лектышыже дене шкем виян да тыршыше педагог семын палдарен шуктен. Тидлан, мутшо почеш, Благовещенск педколледжыште, Бирск кугыжаныш социально-педагогика академийыште тунеммаш сай негызым пуэныт. Тыршен ыштымыжлан А. Шамшитовам образований район пӧлка Чап грамот, Мишкан райадминистраций тауштымо серыш ден палемденыт. А шукерте огыл тудо «Идалыкын методистше-2019» республикысе мастарлык конкурсышто усталыкшым ончыктен да «Методический проект» номинацийыште кокымшо верым сулен налын. БР Образований да наука министерство А. Шамшитовам диплом дене палемден. Самырык туныктышым конкурс да шкеж нерген каласкалаш йодна.

- Ангелина Ивановна, кӧ тугай ешартыш образованийым пуышо учрежденийыште тыршыше методист?
- Методист - тиде эн ондак педагог, йочан веле огыл, кугыеҥынат психологийжым сай палыше специалист лийшаш. Тудо утларакшым туныктышо-влак дене пашам виктара - нунылан тунемме программым чын ямдылаш полша, законысо вашталтыш-влак дене палдара, нунын эртарыме занятийлаш коштеш, конкурслаште усталыкым шуараш тарата да молат.
- «Путник» рӱдерыште методист семын тый могай сомылым шуктет?
- Тыште ме турист да краевед, физкультур да спорт, естественнонаучный, технический, социально-педагогический, художественный корныла дене пашам виктарена. Спорт туризм деч посна педагог-влак шахмат ден модаш, картинг дене кошташ, мураш, кушташ, парашют ден тӧрштылаш, фотоаппарат дене войзаш туныктат. Чылаже 44 йоча ушем пашам ышта. Мый естественнонаучный корнылан вуйын шогем. Эше делопроизводство пашам виктарем. Ме районысо школ-влак ден кылым чак кучена: эколог да лесовод-влак конкурсым, учебно-опытный участке-влак коклаште смотрым, пакчасаска выставкым, экологий олимпиадым, идалыклан кок гана районысо семинарым ямдылена. Тыгак начар тазалыкан икшыве-влаклан мый «Оригами» кружокым эртарем.
- Республикысе конкурс могай шарнымашым кодыш?
- Конкурс кок этап гыч шоген. Заочный этапыште «Методистын усталыкше» видеопрезентацийым да «Модульные программы» теме почеш проектым ямдыленам. Очный этап ноябрь мучаште Уфаште Республикысе йоча туризм, краеведений да экскурсийын оздоровительно-образовательный рӱдерыштыже эртен. Тушто «Поколение нового тысячелетия (дети поколения Z): воспитание и обучение детей и молодежи в системе дополнительного образования» теме почеш мини-кейслан шонымашым почын ончыкташ кӱлын. Мый вашмутыштем калык педагогикым - эрвелмарий-влакын илыш-йӱлашт дене кылдалтше ойӧрым да молым - кумдан кучылтынам. «Педагогический дебат-влак» дискуссийыште ешартыш образований системыште методический службын стратегий сынан вияҥме корныжо-влакым лончыленна. Конкурс мылам моткоч пайдале лие. Шкаланем кугу опытым погенам. Методический проектым, видеоматериалым ямдылаш тунемынам. Ме, республикысе районла да олала гыч чумыргышо 23 пашаеҥ, икте-весына дене паша опытым вашталтенна. Тыге методика шотышто шуко сай материал погынен. Тудым ончыкылык пашаштем кучылташ тӱҥалам.
Читайте нас в