Афган сарын ветеранже лӱмгечыжым палемда

Мӧҥгышт таза-эсен пӧртылшышт, конешне, кажне кечын Юмылан таум ойлат. Йӧсланен индыралт илыше еҥже Юмым мокта але уке, каласаш йӧсӧ. Икте гына раш пале: кажне салтак, «аракашке пурен каен» огыл гын, шке илышыжым аклышыш савырна: шонкаленат мошта, шкенжымат сайын кучаш тырша. Тидын нерген шоныдеак кеч-кунам моло еҥлан примерым ончыкта. Тачысе ойна ик тыгай рвезе, ынде илалше пӧръеҥ, нерген лиеш.

В.А. Шамыкаев 1964 ий 8 декабрьыште Мишкан районысо Пӱрӧмучаш ялеш шочын. Тений тудлан 55 ий темын. 1980 ийыште шочмо ялысе школышто 8 классым пытарымек, Кумертау оласе педучилищыш тунемаш пурен. 1983 ийыште тудым направлений дене Новотроицк школышко физруклан колтеныт.

Вячеслав Алексеевич шукат пашам ыштен шуктен огыл, 1983 ий 23 октябрьыште армийыш налыныт. Тудо Куйбышев (кызыт Самара) оласе частьыште изи командир-влакын школыштышт тунемын. Сержант школ деч вара 1984 ий майыште Афганистан Республикыш призыватленыт. Тудо Кабул олаште, Теплый Стан манме верыште, 58-ше автомобильный бригадыште служитлаш тӱҥалын. Вашке старший сержант марте кушкын шуын, взвод командирын алмаштышыже лийын. Армийысе газетыш возымо статьяштыже дисциплиным, калык коклаште келшымашым вияҥдаш ӱжын. Тудын дене пырля руш, украин, туркмен, марий да моло калык гыч лекше рвезе-влак служитленыт, икте-весыштым пагаленыт да йӧсӧ жапыште ваш-ваш полшаш тыршеныт.

В.А. Шамыкаев 1986 ий январь тылзыште демобилизоватлалтын. Афган сарыште лиймыжлан «70 лет Вооруженных сил СССР», «20 лет вывода советских войск из Демократической Республики Афганистан», «25 лет вывода советских войск из Демократической Республики Афганистан» да «30 лет вывода советских войск из Афганистана» юбилейный медаль-влак дене наградитлалтын.

Тудо ийынак Уфасе Домостроительный комбинатыш формовщиклан пашаш пурен. Варажым крановщик-стропальщик лийын. 1990 ийыште Мишканыш илаш куснен. Пожарный частьыште инструкторлан, Пионер пӧртыштӧ методистлан ыштен, тӱрлӧ кружокым намиен.

1992 ийыште уэш Уфашке пӧртылын. УПТК предприятийыште мостовой кранын машинистшылан ышташ тӱҥалын. 2005 ийыште электросварщик пашашке куснен. 2010 ийыште предприятийыштым Домостроительный комбинатыш ушеныт.

Вячеслав Алексеевичын пашажым предприятийыштыже кӱкшын акленыт. Производствышто тыршен ыштымыжлан шуко Чап грамотым пуэныт. Кӱлеш годым шкеже конструктор-влакланат сай каҥаш-влакым темлаш ок вожыл. Лӱдде каласаш лиеш, тудын опытшо дене южгунам инженер-влакат пайдаланат.