Шочмо кундемлан вуем савем

Илыш, жап да паша нерген шонкалымаш Гельсий Зайниевич Зайниев кодшо ийлаште «Чолман» газетыш шуэнжак огыл возен шога ыле. А кызытрак тудын статьялаже газетыштына огыт кой. Шукерте огыл тудо шкеже ик сомыл дене мемнан редакцийыш звонитлышат, пытартыш жапысе илышыже да пашаж нерген мут лекте. Да ме умылышна: Гельсий Зайниевич ончычсо семынак газет ден журналлашке возен шога, ий еда манме гаяк книгам луктеда. Чыла тидым шотыш налын, тудын деч пытартыш ийласе пашаж нерген «Чолманын» лудшыжо-влаклан кумданрак серен колташ йодна. Ӱлан журналистын каласкалымыжым печатлена.

Г. Зайниев. 1966 ий. Еш архив гыч налме фото.

«Чолман» - эрвелмарий илышын воштончышыжо

Мый «Чолман» газетым окенак шогем. Чын, тудым шкеже налмаш уке, толшо номерлажым Чавайн лӱмеш Национальный библиотекыш мийыме годым лудам. Ойлыманат огыл, шочмо республикын, тусо марий-влакын кузе илымыштым эреак пален шогымо шуэш, тидын шотышто мыланна, Йошкар-Олаште илыше-влаклан, «Чолман» газет кугун полша. Тудлан кужу ӱмырым, чолга автор-влакым да ӱшанле, шочмо йылме ден литературым, культурым йӧратыше шукырак подписчикым тыланыме шуэш.

Шижалтеш, пытартыш ийлаште тиде газетым налше да окышо-влак изиш шагалемыныт. Тыгаяк шӱлыкан сӱретым моло газет ден журнал-влак шотыштат ужына, палена. Ожнырак, кунам мый шкенан райгазетыш селькор семын серкаленам, Башкирийыште «Чолман» гай газет лийын кертме нерген шоналташат тоштын огынал. А ынде тудо уло, но акленже пешыжак огына мошто, коеш. Кызыт илыш тунарак неле огыл, калыкат пеш нужнанжак ок иле. Вес семын каласаш гын, кажне гаяк еш - кумылжо уло гын - шочмо республикысе марла газетым налын кертеш.

Руш-влак пеш чын ойлат: «Что имеем, не храним, потерявши, плачем». Такше мо улыжым аклен мошташ кӱлеш ыле. Тыгерак каласаш лиеш еҥ-влак шотыштат. Талантан, кугу лӱман еҥ да тыглай родына-влакын илымышт годым нунылан поро мутнам да кумылнам пуйто чаманена. Кугу ойго толмо деч вара гына, кунам саде еҥ-влак мемнан деч ӱмырешлан ойырлат, тунам иже ме нунын могай сай да шерге улмышт нерген ойлаш тӱҥалына.

«Чолманыште» Башкирийыште илыше автор-влакын - кугу ийготанынат, йочажынат - почеламутышт, моло тӱрлӧ произведенийышт шуэн огыл лектедат. Тидыже, конешне, куандара. Литературым, йылмым йӧратымаш изи годым «илана». Изиш палем, мыйын шочмо Мишкан районысо Чорай гимназийыште Анжела Леонидовна Юзукбаева (Байрамова), Тымбай школышто Надежда Павловна Минаева йоча-влакым литератур творчествылан кумылаҥден шогат. Нунын тунемшышт олимпиаде ден конкурслаште келге шинчымашым ончыктат.

Моло школлаштат уста туныктышо-влак улыт, тек нуно ончыкыжат «Чолманын» эҥертышыже да пропагандистше лийын шогат. Шукерте огыл мылам Мишкан районысо Пӱрымучаш (але Козаш) гыч школ пашан ветеранже Дмитрий Яметов йыҥгыртыш. Ийготшо кугу гынат, шкенжым чолган куча, йоҥылыш ом лий гын, «Чолманыш» возен шога. Тыгаяк ыле Чорай школын ончычсо директоржо Валериан Дмитриевич Кадеев. Ялыш пӧртылмӧ годым тудын деке ойласен шинчаш ик гана веле огыл пуренам.

(Умбакыже лиеш).

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».