Сеҥымаш - медальын ончыл тӱсшӧ

Российысе кокла профессиональный образованийын вияҥмыже да проблемыже шотышто йодыш-влакым каҥашаш элысе вӱдышӧ ссуз-влакын директорыштым кажне ийын конференцийыш ӱжыт. Тенийсе погынымаш 25-28 октябрьыште Санкт-Петербургышто эртен. Форумышто тыгак «Российын эн сай 100 ссузшо» конкурсышто сеҥыше-влакым палемденыт. Кокла специальный образованиян специалист-влакым ямдылымаште кӱкшӧ лектышым ончыктышо, сеҥышыш лекше тунемме заведений-влаклан лауреат лӱмым пуэныт да шӧртньӧ медальым кучыктеныт, а вуйлатышыштым «Идалыкын директоржо - 2019» почетный знак дене палемденыт.

Башкортостан гыч конкурсын лауреатше-влак коклаш Уфасе шуко профилян профессиональный колледж, Аургаза район гыч ялозанлык колледж да Мишкан селасе ялозанлык колледж логалыныт. Россий кӱкшытыштӧ колледжым эн сай тунемме заведений-влак коклаш лукмыжо да «Идалыкын директоржо» номинацийыште сеҥымыж дене В.Т. Байбулатовым шокшын саламлена!