Пашаж дене кугешнена

А.П. Байназов 1954 ий 10 сентябрьыште шочын. Изинек пашам йӧратыше, пӱсӧ уш-акылан, пеҥгыде койыш-шоктышан кушкын, аван икымше полышкалышыже лийын. Школышто сайын тунемын, спорт дене пеҥгыде кылым кучен, тунамак шкевуя гармоньым шокташ тунемын.

Чорай кыдалаш школым сайын тунем пытарымеке, эл ончылно порысшым шуктен, 1972-1974 ийлаште Балтийский Военно-морской флотышто служитлен.

Армий гыч пӧртылшӧ уста гармоньчым шочмо ялысе клубыш вуйлатышылан шогалтеныт. Тудын клубышто ыштыме жапыштыже ял клубна чотак гӱжлен. Шуко еҥан куштышо коллектив районышто веле огыл, республикысе конкурслаштат лауреат лӱмым сулен. А пошкудо яллашке концерт дене миеныт гын, клуб тич калык вучен. Клубышто ыштыме жапыштак, паша деч кӱрылтде, А. Байназов Москвасе Всесоюзный юридический заочный институтым тунем лектын, «правовед» специальностьым налын.

Мутым пеҥгыдын кучымыжым, сай лектыш верч пашам тыршен ыштымыжым ужын, Александр Пайдиевичым 1990 ийыште Чорай сельский поселений вуйлатышылан сайленыт. Тыштат тудо кыртмен пашалан пижын. Байназовын вуйлатыме жапыште яллаште шуко паша шукталтын.

Пӧкленде ял калыкна у медпункт, ял клуб ден библиотекым капитально ачалыме, пӧртлашке газым пуртымо, Кугу Отечественный сарыште кредалше землякна-влак лӱмеш обелискым почмо, уремым волгалтарыше понар-влак, пожарный резервуар, шӱгарла йыр печым печыме, ялыште корным тӧрлымӧ дене кугешна.

Тудо жапыште ял илемыште шуктымо пашам иктешлыме смотр-конкурслаште Пӧкленде ялна эре призовой верым наледен. Александр Пайдиевичын 25 ий коклаште шуктымо пашажым ойленат от пытаре.

Паша лектышыжым аклен, А. П. Бай-назовым 2002 ийыште калык переписьым да 2006 ийыште ялозанлык переписьым сайын эртарымылан медаль-влак дене наградитленыт. Шуко гана район администрацийын Чап грамотыжо да тауштымо серышыж дене палемденыт.

Кызыт мемнан юбилярна сулен налме канышыште гынат, район Советын депутатше улеш.

Александр Пайдиевич ден Светлана пелашыже 41 ий ваш келшен илат. Светлана Алексеевна, Чорай ялын ӱдыржӧ, специальностьшо дене фельдшер.

Тыгай пашаеҥ нерген, руш манмыла, «Медицина - тудын призванийже» манаш веле кодеш. Сулен налме канышыш лекмешкыже, медицина пашаштак тыршен.

Нуно кум икшывым ончен куштеныт. Вадим, Алёна, Вероника кумытынат кӱшыл шинчымашым налыныт. Ача-ава сурт деч торлен, кажныже шке еш дене илат гынат, шочмо суртыш чӱчкыдын погынат. Коча-ковам вич уныка куандара.

Вашке Александр Пайдиевичым икшывыже, уныкаже, тулар-тулачыже, родо-шочшыжо, пошкудо да йолташыже-влак лӱмгечыж дене саламлат. Меат Александр изайнам шушаш чапле лӱмгечыж дене, Светлана еҥгайнам эртыше юбилейже дене шокшын саламлена, нунылан пеҥгыде тазалыкым, кужу ӱмырым, еш пиалым тыланена.