Тек пеледыш пеледеш, тӱняна мотор лиеш!

Надежда Мурзагареевна эн чотшо петунийым йӧрата. Шошым шуко озымым налеш, а бархатце озымым шке ышта. Нӧшмым февральыштак ӱда.

Предпринимательын пеледышлан шӱман улмыжо урем гычак шижалтеш. Пеледыш йыраҥым сӧрастараш тыглай кӱм, опилкым, шун кӧршӧкым, автошиным да молымат кучылтеш. Тыглай кӱ дене оҥай альпийский курыкым, тошто кермыч дене бордюрым ыштеныт, шине-влак гыч мотор кӧршӧкым пӱчкеден луктыныт, тӱрлӧ чия дене чиялтен шогалтеныт. Чылажат пеш сылнын коеш. Кевытыш толшо-влаклан каналтен шинчаш беседкым шынденыт, тушто йоча-влакат кумылын модыт.

Озавате пеледышыже-влак дене шыман кутыралтен колта: «Таче тендам тале йӱр тазан ыш лупшо гын? Теҥгече чевер кече чот ыш когарте гын?» Вет пеледышат тӱткышым йодеш. Эше тыгеат ойлат: «Пеледыш сай айдеме дене гына илана да тӱзланен кушкеш».

«Пеледыш мыланем илаш вийым пуа, чонем куандара, нойымем мондыктара. Йырым-йыр ару, мотор да сӧрал лиеш гын, айдемат порештеш», - мут ярымжым ронча Надежда Мурзагареевна. Пеледышым ончаш, шке жапыштыже ӱяҥдышым, вӱдым шаваш, шӱкшудым кӱраш жап кӱлеш. Чылажымат ыштен шуктыман. Тыршен ыштыше коллективше - тудлан эн кугу эҥертыш.