Чонлан келшыше паша куаным конда

Икымше категориян математикым туныктышо М. Шамратовын паша стажше - 36 ий. Тудо туныктымо пашан тÿрлö шöрыныштыжö кÿкшö лектышыш шуын. «Идалыкын туныктышыжо - 2000» район конкурсышто сеҥен, республикысе конкурсышто вийым терген. Туныктышо-влакын IX съездышкышт делегат семын миен (2001-ше ий, Уфа ола). 1986-шо гыч 1990-ше ий марте школ директорын воспитательный паша шотышто полышкалышыжлан ыштен, 2002-шо гыч 2010-шо ий марте школым вуйлатен. Тудын тыршымыжлан кöра 2007-ше ийыште школлан изак-шоляк Беловмытын лÿмыштым пуымо. Тиде еш мыланна чыла шотыштат пример. Нуно чылан школнан выпускникше улыт. Лу икшыве гыч шымытше сарыште элым арален, тиде еш гыч кум лётчик, кум медицина пашаеҥ, кок генерал лектыныт. Михаил Александрович тиде еш дене пеҥгыде кылым куча, ик гана веле огыл нунын деке вашлиймашке миен коштын, школыштынат нуным эре алал кумылын вучена. М. А. Шамратов школ музейын пашажлан вуйын шога. Школ историйым, музей материалым сайын пала. Толшо уна-влаклан экскурсийлам эртара. Музей фондым пойдараш, уэмдаш вийжым ок чамане. Икманаш, ÿшанен пуымо паша деч нигунам вуйым огеш шупш.

Ик школышто кумло куд ий пашам пырля ыштена, садлан чыла шинча ончылно эртен: чылажымат мучаш марте лийже манын шуктымаш, лектыш верч йÿлен-когарген тыршымаш, чылалан полыш кидым шуялташ ямде лиймаш. Илышын чыла шöрынжыланат вашмутым пуэн кертеш, пÿсö уш-акылан улмыж дене ойыртемалтеш. Илыме ÿмырыштыжö мыняр книгам лудмыжым шотлен пытарашат ок лий. Книга - тудын эн йöратыме хоббиже, тунемше-влакымат тидлан кумылаҥден шога. Тений эртарыме виш класс шагатымат книгалан пöлеклен. Михаил Александрович класс вуйлатыше семын кум классым луктын. Тудо шке тунемшыже-влак дене кугешна, нуно элнан тÿрлö луклаштыже илат да туныктышышт дене пеҥгыде кылым кучат.

«Спорт - тиде тазалык», - манеш Михаил Александрович. Тудо ече дене кошташ йöрата, жапыштыже Бирск пединститутын чапшым арален. А баскетболым йöратымыже школыштына 1995 - 2017-ше ийлаште ÿдыр-влак дене баскетбол кружокым вÿдаш таратен. Окса укелан кöра кружокым тарифицироватлен огытыл гынат, М. А. Шамратов садак икмыняр ий занятийым эртарен. Ӱдыр-влакын йÿлышö шинчаштым да таҥасымашлаште сеҥымыштым, кугурак таҥасымашлаште районын чапшым аралымыштым нимо дене таҥастараш огеш лий.

Михаил Александровичын тÿҥ пашаже - математика уроклам вÿдымаш, ЕГЭ-лан, ОГЭ-лан ямдылымаш. Туныктымо жапыштыже ятыр тунемшыже кÿкшö баллым поген да шонымо верышкыже тунемаш пурен кертын. «Кажне йоча математикым палышаш, вет тудо шонаш туныкта, ушым вияҥда», - манеш тудо.

Туныктышо яра жапыштыже мÿкшым онча. Тамле мÿй родо-шочшыжым сийлаш веле огыл, йодшылан ужалашат сита. Михаил Александровичын эше тыгай ойыртемалтше койышыжо уло: тудо ик чонанымат ок тÿкö. Мÿкш але пачемыш пöртыш чоҥештен пурат гын, нунынат илымышт шуэш манын, кучен, луктын колта.

Теве тыгай улеш кок институтышто шинчымашым погышо (Бирск пединститут, 1982 ий, математика да физика туныктышо; Башкир кугыжаныш пед-институт, 1986 ий, калык образованийын организаторжо), Тынбай ялеш шочын-кушшо, ÿмыржым школ илыш дене кылдыше мыйын кок шочмо изам. Ме тудын дене кугешнена!

Тыршен шуктымо пашажым кÿкшын аклыме. Башкир АССР Калык образований министерствын Почётный грамотыж дене (1991 ий), «Башкортостан Республикысе образованийын отличникше» знак дене (2000 ий), Башкортостан Республика Президентын тауштымо серышыж дене (2003 ий), район администрацийын да образований пӧлкан ятыр Почетный грамотышт дене палемденыт.

«Туныктымо пашаште мом эн тÿҥлан шотледа?» манын йодмемлан тыгерак вашештыш: «Уло кумыл дене пашам ыштыман, шÿм-чонлан куаным кондыман да йоча-влакын куанле шинчаончалтышыштым ужын моштыман».