Кычалаш, муаш, шонымашыш шуаш

В. Миндияровын автосервисыштыже тидлан оборудованийжат, специалистшат улыт, сай кӱкшытан лектышышт дене ойыртемалтыт.

Чыла тидым шукташ палыше, тыршышан да уста пашаеҥ-влак кӱлыт. Нуным кушеч муман? «Кызытсе илышыште паша вер пеш чӱдӧ, тудым муаш куштылго огыл, - ойла Владимир Бикянович. - Туге гынат пашам йӧратыше, тыршен ыштыше еҥым верешташ - урем гыч шӱшкалтен ӱжын пуртымо гай огыл. Тудым эше автосервисыште профильный специалист семын туныктен шуктыман. Ответственность кугу. Ачалаш пуымо машинан озаже корнышто лӱдыкшыдымылык деч посна коштшаш. Тидыже мемнан пашана деч шога».

Шаран районысо ик эн ямле Янахмат ялысе (Марий поэт Шадт Булатын шочмо верже.) кугу ешыште рвезе кудымшо шочын. «Пытартыш, эн изи икшывым мемнан дене «тӱпчык» маныт, - йоча годсыжым воштылал шарналта Владимир Бикянович. - Мыят ешыште тыгай лийынам».

Техникылан шӱман рвезе школ деч вара, шонымыж семынак, шоферлан тунем лектын, армийыш каен. Саратов оласе Высший военный командный Краснознаменный училище начальникын алмаштышыжын водительже семын кок ий служитлен. Ече спортышто шуаралтмыже туштат кӱлеш лийын, тудым биатлонист-влакын командышкышт налыныт. Тугодсо жапшым, элысе лӱмлӧ биатлонист-влак Юрий Кашкаров, Валерий Барнашов (Кызыт РФ биатлон командын тӱҥ тренерже.) дене пырля куржталмыжым чӱчкыдын шарналта.

В. Миндияров ялыште илымыж годым пушеҥге гыч чоҥымо, тӱрлӧ ӱзгарым ыштыме пашаш вуйге пурен каен, чапле пӧртым чоҥен шогалтен. Кызытат, кеч-могай пашам ышта гынат, эре ала-мом уым кычалеш, шонкала, кузе сайрак ышташ лиймым вискала. Мутлан, оҥам пӱчкаш (шелаш) да пужараш ик тӱрлӧ, а тӱржым лакемден кораш (закройжым налаш) вес тӱрлӧ станок кӱлыт. А тудо чыла тиде кум операцийым ик вере ыштыме станокым шонен луктын, шкеже тудым «двойной деревообрабатывающий станок» манеш. А вара, тудын рационализатор йӧнжӧ дене пайдаланен, моло-влакат тыгай станокым ышташ тӱҥалыныт.

Пытартыш шонен лукмыжо эшеат оҥай. «Нива» легковой автомашиналан лумым шӱкымӧ агрегатым (Калыкыште тудым «лопата» маныт, шӱкышӧ тракторыным налаш гын.) келыштарен. Телым, лум вочмо годым, уремыште лумым трактор гай шӱкен кая.

Автосервисышкыже ончалаш гын, тыштат рационализаторын куштылго кидшын, волгыдо ушыжын кышаштым ужаш лиеш. Сервис воктенсе шукертак кӱлдымашыш лекше, шолдыргышо котельныйым налын, тудлан кокымшо «илышым» пуэн. Автомашина двигательым, коробкым ачалыме годым тоштемше ӱйлымӧ-шӱрымӧ материалым («отработкым») посна бочкыш погат, тыгак орава шиным луктын огыт кышке, иквере чумырат да телым горючий олмеш кучылтыт, котельный гоч (Тыштат шкенжын шонен лукмо ятыр у технологийым шыҥдарен.) автосервисын цехше, пӧлемже-влакым ырыктат, а кузовым чиялтыме пӧлемыште кӱкшӧ температуран юж эре кӱлеш.

Шараныште автосерви-сым почмыж годым В.Б. Миндияров ялыштыже илен. Ятыр ий пашашке кажне кечын 35 уштышым эртен кошташ логалын, тынарак - мӧҥгышкӧ пӧртылаш. Варажым, райрӱдыштӧ мландым налын, у сурт-печым чоҥаш пижын. «Шкеак архитектор, прораб, строитель лийынам. Икымше кермыч гыч тӱҥалын, мучаш марте Светлана пелашем дене коктын чоҥенна, ешланна илаш каньыле, уна-влаклан кумылло лийже, мемнан деке толмышт годым порын каналтен кайышт манын тыршенна. Конешне, икмыняр ий, шийвундым да материалым ситарыме семын, чоҥенна. Адакшым тидлан тазалык кӱлеш, шагал огыл вий-куатым пыштыман», - чапле озанлыкшым могай проект почеш чоҥымыжым палаш шонет гын, тыге вашешта суртоза.

А мончаже… Тыште шокшо южшат посна таман, пушкыдо, шӱлаш куштылго. Лакаште выньык дене могырым пушландарен кырыме деч вара вӱд дене чывылталтме пӧлемыш логалат, а тушеч каналтыме верышке лектат. Но тидат эше чыла огыл. Умбакыже - мотор плитке дене сӧрастарен ыштыме эн чапле да кугу пӧлем - уна-влаклан. Туштак ӱстел, диван, каналтен шинчаш кӱлшӧ моло арвер улыт - икманаш, чылт унагудо. Монча коҥга гыч тӱҥалын, чылажымат шонкален-вискален ыштыме.

Владимир Бикянович шкежат, Светлана пелашыжат виш марий чонан, весела кумылан улыт. Айдеме пашаж дене мотор, маныт, садлан нунын суртыштат, пашаштат мотор. Марий йӱлам, пайремым, концертым йӧратат. Нуным тыгай мероприятийлаште Шараныште веле огыл, вес районышто але олалаштат ужаш лиеш. Йӱдшӧ-кечыже пашаште тыршат гынат, Йошкар-Олашкат миен толаш жапым муыт.

Садланак поро кылым кучымо йолташышт шукын улыт, марий артист-влакат нунын дене уна лияш йӧратат, Миндияровмытым шкеныштымат унала ӱжыт.

Пашаче мужырын уна-влак коклаште муралтен колтымыж годым пиалан улмыжым шижат. Марийын пиалже - тудын чоныштыжо, лач тидым пырля лийме годым чурийже почын ончыкта.

Владимир Бикяновичын шонымашыжым умбакыже шуяш Уфасе авиационный институтым тунем лекше Максим эргыже полша, «Влад» автосервисыште ынде тудо эн кугу эҥертыш. Миндияровмытын Валерия ӱдырыштат изинек тыршышан лийын кушкын, кок кӱшыл шинчымашым налын: Альметьевскыште нефтяной институтым пытарен, Озаҥыште экономистлан тунем лектын. Ешыж дене Октябрьский олаште ила.