Кажне ийгот шке семынже сӧрал

Валентина Сайтаева Илиш районысо Марин ялеш шочын-кушкын. Ешыште нылымше икшыве, а кум ӱдыр коклаште - кыдалаш. Ял калык мемнам «Галя-Валя-Аля-влак» манын лӱмден.

Еш чот улан илен огыл, но ыштыш-кучышлан мо кӱлешыже лийын. Ачана, Зай-

нитдин Зайнуллин, - сарын ветеранже, орденоносец. Сар деч вара тудым колхоз председательлан сайленыт. Пеш тыршен, лийже манынак пашам ыштен, еҥ дечат тугак йодын. Авам, Анастасия Иштугановна, топката кап-кылан, грамотдымо ӱдырамаш ыле, но грамотан еҥ-влакым пагален, садлан чылаланнат шинчымашым налаш полшен. Авам пашаче, виян, пеш ушан айдеме ыле, мом гына ыштен моштен огыл. Марла да татарла шуко калыкмутым, легендым пален. Валя шӱжарем эре авам пелен коштын, сомыллан полышкален. Авана деч чаткалыклан, пашам шуктен ышташ тунемын.

1964 ийыште Андреевка школышто 8 классым тунем пытарыме деч вара Валентина Башкир кооперативный техникумыш плановик-экономистлан тунемаш пурыш. 1967 ийыште тунем лекте да Башпотребсоюзын направленийже почеш Чекмагуш районысо Новобалтачево сельпошто плановиклан ышташ тӱҥале. Декабрь тылзыште дипломым пуымо деч вара Илиш район Андреевка сельпошко экономистлан колтеныт. Тушто лу ий пашам ыштыш, вара, сулен налме канышыш лекмешкыже, Андреевка ялсоветыште бухгалтерлан тыршыш. Шуко Чап грамотыжо, пӧлекше уло, паша ветеран. Калык тудым пагала, каҥаш йодашат коштыт.

1969 ийыште Аначыш марлан лекте. Никита пелашыж дене кум икшывым кугемдышт. Нуно Екатеринбург олаште илат, коча-ковалан вич уныкам пӧлеклышт. Чаманен каласаш логалеш, пелашыже да кугу эргыже ош тӱня дене ондак чеверласышт. Тыгай кугу ойго тазалыкым мӧҥгештарыде ок эрте...

Кызыт Валентина пенсийыште улеш. Воктенже пеш поро пӧръеҥже, Николай Иванов, уло. Тудо Марий Элын шочшыжо. Тату, сай илышым илат, икте-весыштлан полшат. Вольыкым ашнат, тӱрлӧ емыжым ончен куштат.

Валян пакча кӧргыжым ончен куанет. Чыла вере сылне пеледыш пеледеш, йырым-йыр ик пырче шӱкшудым от уж. Арамлан огыл кажне ийын верысе ялсоветын эртарыме конкурсышто эн сай участкылан Чап грамотым да пӧлекым кучыктат.

Валя шочмо йылмыланна шӱман. Анач ялыште школ укелан, йоча-влак марий йылмым тунемдымылан пеш чот ойгыра. «Чолман» газетлан подпискым ышташ Илиш район гыч лӱмын редакцийыш толеш. Марий мурым колышташ йӧрата, концертлаш коштеш.

Пеш пашаче, уста, поро кумылан шӱжарем В.З. Сайта-ева май тӱҥалтыште 70 ийым тема. Лӱмгечыже амал дене шуко поро шомакым каласыме шуэш. Таза лий, шоҥгылык толмылан ит ойгыро, тек шӱм-чонет эре самырык да весела кодеш.