Чыла сомылым ворандарен ышта

Мутем Акпарс кыдалаш школын опытан туныктышыжо А.А. Асмаева нерген лиеш. Ангелика Александровна ты пашаште 32 ий тырша. Тудо Шаран район Шалтыкбаш ялеш шочын. Гульян Мухаметгалеевна да Александр Акбатырович Асмаевмытын эн кугу ӱдырышт. 1986 ийыште Шаран кыдалаш школым сайын тунем лекме деч вара Усола кандашияш школышто историйым да обществознанийым туныкташ тӱҥалын.1993 ийыште, паша деч кӱрылтде, Башкир кугыжаныш университетын исторический факультетшым тунем лектын.

Туныктышо шкеж нерген шуко каласкалаш ок йӧрате. Мутланымына годым тыгерак каласыш: «Туныктымо корнем Усола школ гыч тӱҥалын. Школышто мыланем, самырык туныктышылан, тунам чылажат у, палыдыме лийын. Тунемше-влак дене пырля шкежат тунемынам. Жап эртыме семын опыт погынен. Теве ынде, эртышым шарналтен, тачысе илыш дене таҥастараш йӧн уло. Ончыч йоча-влак тыршымаш дене ойыртемалтыныт, книгам шуко лудыныт. Тунам кӱлеш материалым Интернетыште кычалме, ямдым налме огыл, чылажымат шке кид дене ыштыме. Тидыже уш-акылым келгемдашат, кидым лывырташат полшен, а кызыт тиде ок шижалт. Кызытсе икшыве-шамыч йӧршын вестӱрлӧ улыт».

1996 ий годсек Акпарс школышто шке пашажым умбакыже шуя. Шым ий завуч сомылым шукта. Туныктышо занятийым эплын, вурседылде, радам дене умылтарен, шыргыжалын эртара. Йоча-влак историйым да обществознанийым уло кумылын тунемыт. Выпускник-влак обществознаний дене иктешлыше экзаменым (ОГЭ-м да ЕГЭ-м) ойырен налыт, сай шинчымашым ончыктат. Ангелика Александровна пеҥгыдын йодын моштымыж дене ойыртемалтеш, тӱрлӧ йӧн дене пайдалана, тудын урокшо тӱрлӧ йыжыҥан, оҥай. Чыла пашажым ворандарен ышта. Тынар ий жапыште «Идалыкын туныктышыжо» конкурсышто, республикысе научно-практический конференцийыште, олимпиадыште вийым терген, копилкыштыже школ администрацийын, образований район пӧлкан, «Марий вий» организацийын Чап грамотышт да тауштымашышт шуко погыненыт. Уста туныктышылан «Башкортостан Республикысе образованийын отличникше» знакым пуымо. Шке пашам да йочам йӧратымаш тудлан тыгай кӱкшытыш шуаш полшеныт.

Ангелика Александровна - марий шӱлышан ӱдырамаш. Мер пашашкат чулымын ушна. Шуко ий школышто профком вуйлатышылан ыштен, Акпарс сельский поселенийыште Усола ялын депутатшылан сайленыт, драмкружокыш коштеш. Спектакльлаште эре тӱҥ рольым пуат. А кузе келыштарен модеш! Эше тудо сай озавате да ава. Артур эргыже Уфасе речной училищыште судоводитель-мотористлан тунем лектын. 2016 ийыште Москвасе вӱд транспорт кугыжаныш академийыш заочно тунемаш пурен. Кызыт йот эллаш грузым шупшыктышо компанийыште пашам ышта.

Уста туныктышо 27 апрельыште 50 ияш лӱмгечыжым палемда. Мыят тудым мотор пайремже дене саламлем. Тазалыкым, пиалым, кужу ӱмырым, пашаштыже тӱвыргӧ лектышым тыланем.