Надежда Давлетова - идалыкын директоржо

«Российысе ӱдырамаш-предприниматель-влакын ассоциацийышт» (1991 ий 13 июньышто регистрироватлыме) Россий Федерацийын Кугыжаныш Думыжлан да Федеральный Собранийын Федераций Советшылан эҥертен, шым тӱрлӧ конкурслан проектым ямдылен. 2019 ий 14-15 мартыште Москваште «Российын пашазе алмаштышыже», «Российын паша чапше», «Идалыкын самырык директоржо», «Ӱдырамаш - идалыкын директоржо», «Российын сулло директоржо», «Вуйлатыме мастарлык», «XXI курымын предприятийже» XXII Всероссийский конкурслам эртарен.

Тушто «Шаран кинде» предприятийын да «Успех» ООО-н вуйлатышышт Н.М. Давлетова «Ӱдырамаш - идалыкын директоржо» конкурсышто ончык лектын. 15 мартыште тудым сеҥыше-влакым палемдымашке мияш ӱжыныт. Надежда Мурзагареевналан «Ӱдырамаш - идалыкын директоржо» медальым да дипломым кучыктеныт.

«Мыланем тиде сеҥымаш йӧршын вучыдымо лие, вет конкурсыш Российын тӱрлӧ кундемлаж гыч пашажым сайын ворандарыше шуко ӱдырамаш ушнен. Кабардино-Балкарий, Чечня Республика, Пермь край, Подмосковье да моло верла гыч моткоч тале ӱдырамаш-влак миеныт ыле. Башкортостан гыч мый да эше Кумертау да Янаул олала гыч кумытын лийынна.

Мутат уке, каласен мошташ лийдымын куаненам. Москвашке икте-весын опытым шымлаш, моло компанийлаште йодышым кузе решатлымым шымлаш шонымаш дене тарванышым - тушто тидлан лӱмлымӧ кугу конференцийым эртарат. Пеш шуко уым пален нальым, шуко пайдале вашлиймашым эртарышт, шкенан опытна нергенат каласкалышым.