Шонымаш - ик семын, илыш - вес семын

Тудо Микеевмытын туныктышо ешыштышт шочын. Ачаже, Алексей Николаевич, математикым, аваже, Лидия Валишивна, тӱҥалтыш класслам, марий йылмым да литературым туныктеныт. Ик гана аваж дене Зайнаш аркаш поход дене мийымыж годым ойлен: «Авай, мый туныктышо лиям гын, тунемшем-влакым арка ӱмбак экскурсийыш кондем да, эн мотор кӱкшӧ верже гыч шочмо Маядык ялнам ончыктен, историйжым ойлем ыле». Но илыш тугай, чылажат шонымо семын огеш лий.

Школым сайын тунем пытарыше Танялан Маядык ял библиотекыште библиотекарьлан ышташ тӱҥалаш темленыт. Ик жап кокытеланен, вет ача-аваже шке корнышт дене тунемаш колтынешт улмаш. Но самырык ӱдыр каен огыл, темлыме пашам ойырен налын. Заочно Уфасе библиотечный техникумым, вара Челябинск тӱвыра да сымыктыш академийын Уфасе филиалжым тунем лектын.

Жап писын эрта. Шымавуч гай марий ӱдырын пашам ышташ тӱҥалмыжлан коло утла ий эртенат каен. Паша верыштыже, библиотекыште, чылажымат келыштарен сӧрастарыме, чыла веран-верыштыже. Татьяна Яниеван мутланен колтымыжо, кӧргӧ сынже Ваштар памашын вӱдшӧ гаяк яндар да мотор улыт. Калык тудым пагала, садлан нимогай интернетат еҥ-влакын библиотекыш коштмыштым чарен ок керт. Библиотекарь эре пашаште. Мийыше еҥым поро кумыл дене вашлиеш. Тӱвыра пӧрт, школ, верысе администраций пашаеҥ-влак дене пырля тематический мероприятий-влакым эртара. Шукерте огыл Елена Семенован возымо пьесыже почеш «Кузе илет, ялем?» спектакльым модын ончыктышт. Шочмо йылмын тӱнямбал кечыже лӱмеш «Шочмо йылмым палет мо?» кугу мероприятийым эртарышт. Марий да руш писатель-влакын юбилейыштлан лӱмлымӧ кас-влак пашаштыже тӱҥ верым налын шогат. «Марий поэт-влак гыч кӧн возымыжо утларак келша?» манын йодмемлан тыге вашештыш: «Мый поэт, артист Йыван Кырлан да шкенан Искуш ял поэтна Мирон Мишенькинын возымыштым йӧратем». Татьяна Алексеевна шкежат шуко сценарийым воза, пайрем кас-влакымат вӱда, сылнын муралта.

Маядык ял корем коклаште верланен. Урем ден уремым кӱвар ушен шога. Татьянан пашаш але моло вере коштмыж годым коло ий жапыште мыняр гана кӱвар гыч эртымыжым шотленат шукташ огеш лий. Йылдыр-йылдыр йогышо эҥер вӱд ӱмбач пыштыме кӱвар дене ошкылмыж годым пашаште сай кӱкшытыш шумо нергенат ик гана веле огыл шонен дыр. Чынжымак, тудлан тыгай пиал шыргыжалын. 2007-ше ийыште Йошкар-Олаште регион-влак коклаште эртарыме «Кугезе-влакын чапышт дене кугешнена» конкурсышто шке вийжым терген да «Эн сай мероприятий» номинацийыште 60 паша кокла гыч тудын ямдылымыже икымше верым налын. Шкенжым Киров областьысе Малмыж кундемыш регион-влак кокласе конференцийыш ӱжыныт. Акпатырым шарныме пайремыште Татьяна Алексеевналан дипломым да шергакан пӧлекым кучыктеныт. Каласаш кӱлеш, конкурсант-влак коклаште Т.А. Яниева Пошкырт кундем гыч шкетын гына лийын.