«Илышлан ом ӧпкеле»

Людмила Сапиевна 1959 ий 8 февральыште Калтаса район Васильевка ялысе кресаньык ешеш шочын. 1986 ийыште ешыж дене Йывангасола селаш илаш куснен. Кугу, топката, мотор чурийвылышан ӱдырамашым секретарь-машинисткылан, а вара бухгалтерлан шындат. Тиде пашаште тудо сулен налме канышыш лекмеш тырша. Расул пелашыже колхозышто шоферлан ышташ тӱҥалеш.

Илышым илен лекташ - пасум вончымо гай огыл. Чылажат лиеш: нелыжат, сайжат, куанжат, шинчавӱдшат. Людмилан илышыштыжат ойго деч посна лийын огыл: Олег шольыжын пелашыжын ӱмыржӧ рвезынек лугыч лиеш. Руслан эргыже кум ияш веле кодеш. Тылеч вара Олег шольыжо шкежат аварийыш логалеш да инвалид коляскыш шинчеш. Людмила Руслан племянникшым, Олег шольыжым, шоҥго аважым шкешт деке илаш конда. Ик жап гыч Расул пелашыжат илыш дене чеверласа. Туге гынат Людмила нелылыклан вуйым ок пу. Кушнаренкысе ял озанлык техникумым тунем лектеш. Денис эргыжлан, Руслан племянникшылан образованийым пуаш тырша. Нуно коктынат Благовещенск педучилищым тунем лектыт. Денис Владиславович кызыт Йывангасола школышто туныктышылан ышта - физкультур урокым эртара. Руслан педучилище деч вара сварщиклан тунем лектын. Тудо Нефтекамск автозаводышто 13 ий сварщик пашам шукта. Тидым шотыш налын, Башкортостан Республикыште Еш идалык ийыште Краснокам райадминистраций Л. Зариповам тауштымо серыш дене палемден.

«Илышем неле лийын гынат, ом ӧпкеле. Куд уныкам уло, сулен налме канышыште улам. Кызыт «Заря» ял озанлык кооперативыште бухгалтер пашам намием. Тиде пашалан 28 ий утла виемым пыштенам. Яра жап улмо годым лудаш, тӱрлаш, пидаш йӧратем. Кеҥежым сад-пакчаште шогылтам, тӱвыра пӧртыш мураш коштам, районышто эртарыме тӱрлӧ мероприятийлаште вием тергем», - ойла Людмила Сапиевна.

Тургыжланымаш, ойго да осал шонымаш ӧрдыжеш кодышт, а шӱм-чонет ласкалык дене темже. Шоҥгылыкым веселан вашлийын, пошкудет да йолташет-влак дене келшен, умылен, икте-весым пагален, илышым шуяш тыланена. Пиалан, таза да кужу ӱмыран лий.