Муро тӱняште ила

Людмила Васильевна Калтаса районысо Шоръялеш шочын. Йоча жапше Келтей селаште эртен. Тусо школышто тунеммыж годым самодеятельностьыш кумылын ушнен, хорышто мурен, солист лийын. Йоча-влак ятыр смотрышто выступатленыт, ончыл верыш лектыныт.

Школ деч вара куш тунемаш пурымо шотышто йодыш лектын огыл: мураш йӧратыше еҥ музыкальный училищыш пурышаш. Тыге тудо 1964-69 ийлаште Йошкар-Оласе музыкальный училищыште шинчымашым поген. Тушто моткоч сай педагог-влак лийыныт, Л. Пашуткина Т.Н. Корнеевалан тачат таум ышта. Кумшо курсышто тунеммыж годымак группын старостыжо Людмила «Продтовары» ушемын хоржо дене пашам ышташ тӱҥалын, вара коопе-ративный техникумын хоржым вӱден. Хор вуйлатыше да йоча музыкальный школышто туныктышо специальностян туныктышым Шернур посёлкысо йоча музыкальный школыш колтеныт. Тушто 20 ияш ӱдыр В. Ленинын шочмыжлан 100 ий теммылан лӱмдымӧ мероприятийыште выступатлаш кугу хорым поген. Тушко интернатын, школын туныктышыжо-влакым, тӱвыра пашаеҥ-влакым да молымат ушен.

Сай специалист лияш эше ешартыш шинчымаш кӱлмым шижын, ӱдыр умбакыже Уфасе сымыктыш институтын хор- дирижёр факультетышкыже тунемаш пурен. Тушто пеш келге шинчымашым пуэныт. Тунемме жапыштак тудо самодеятельный хор-влак дене пашам ыштен (ургымо фабрикын, университетысе биофакын хорышт). Вуз деч вара Йошкар-Олашке пӧртылын да культпросветучилищыш пашаш пурен. Тыште 25 ий (1975-2000 ийла) пашам ыштен. Очный да заочный пӧлкалаште хор дисциплине-влакым вӱден. Тылеч посна мер пашаштат тыршен: 10 ий - профкомышто, тынарак - худсоветыште. Кураторат лийын, хорымат вуйлатен. Икманаш, йӧратыме пашажлан уло вийжым, мастарлыкшым пуэн. Да студентше-влакым тудо шке ешыж семынак йӧратен.

Шке ешыже манмаште... Пелашыже Григорий Петрович Пашуткин (тудат шочынжо Калтаса район гыч) дене кок эргым ончен куштеныт. Денис ден Антон жапше годым коктынат Чайковский лӱмеш музыкальный училищым тунем лектыныт, вара политехнический образованийым налыныт. Суртоза, Григорий Петрович, профессийже дене инженер гынат, мура, кушта, баян дене шокта. Кок уныка, Андрей ден Саша, кова-коча семынак музыкым да спортым йӧратат. Пашуткинмытын кум пӧлеман пачерыштышт кугу верым пианино налеш. Кажне пайрем годым еш да йолташ-влак, пырля погынен, марий муро-влакым мурат.

Людмила Васильевна тачат яра ок шинче, «Эрвел марий» ансамбльыште хормейстерлан пашам ышта, эрвелмарий-влакын «Ош Виче» землячествыштышт чолга еҥ.